Киир

Киир

Арассыыйа Ыччатын Спартакиадатыгар,  оҕунан ытыыга, Саха сириттэн сылдьар хамаанда кыһыл көмүс призер буолла.

 Орел куоракка ыытыллыбыт Ыччат спартакиадатыгар, оҕунан ытыыга МИКС хамаанда иһигэр (көннөрү оххо), сахалар көмүс мэтээлгэ тигистилэр. Хамаанда иһигэр бастыҥ көрдөрүүнү ситистилэр Рената Курчатова уонна Алексей Михайлов. Тус сочуокка 3-с бочуоттаах миэстэҕэ тигистэ Юлия Маркова (блочнай ох) уонна үс 4-с миэстэлэргэ таҕыстылар Айаал Адамов (блочнай ох), МИКС бөлөх иһигэр Юлия Маркова уонна Айаал Адамов (блочнай ох), Рената Курчатова (көннөрү ох).

Рената Курчатова бэлиэтиир: «Барҕа махтал тылларын тиэрдиэхпин баҕарабын Саха сиринээҕи оҕунан ытыы Федерациятыгар, чуолаан түмсүү бэрэссэдээтэлигэр Василий Петрович Николаевка, кыайыыга сертификаттарга үбүнэн көмөлөспүтүн иһин. Бу инники ситиһиилэргэ кынаттыыр. Биһиги спортивнай олохпутугар маннык көмө элбэҕи быһаарар».

Билигин, Рената үрдүк үөрэх кыһатыгар туттарсарга уонна Улан-Үдэҕэ, Читаҕа буолан ааһыахтаах Арассыыйа Чемпионатын Кубогар бэлэмнэнэр.

Эдэр спортсменка санаатын үллэстэр: «Мин оҕунан ытыы успуорт көрүҥэр хара бастакы күммүттэн ылларбытым. Онтон атын тугу да санаабат этим. Урут успуорду, художественнай уһуйаан дьарыктарын кытта дьүөрэлиир этим. Бириэмэ биллэн турар туохха да тиийбэт этэ, бэл аһаабакка да хааларым. Оскуоланы бүтэрдэхпинэ дьэ элбэх иллэҥ бириэмэлэнэрим буолуо дии санаабытым, оннук буолбатах эбит, хата төттөрүтүн олох быыһа-арда суох олох саҕаланна. Нэдиэлэ устата алта күн субуруччу дьарыктанабын. Билигин, Токиоҕа буола турар Аан дойдутааҕы спартакиаданы күннэтэ кыраҕатык кэтиибин, биһиги охчуттарбытыгар сүрэхпинэн-быарбынан ыалдьабын, кинилэр кыайыыларыгар олус үөрбүтүм».

Бу иннинэ эрдэ, Рената Курчатова Арассыыйаҕа Бастыыр иһин оҕунан ытыы күрэҕэр үрүҥ көмүс призёр буолбута. Бу күрэххэ бастыҥнар кэккэлэригэр кини соҕотох буолбатах этэ. МИКС хамаандаҕа көннөрү оҕунан ытыыга бөлөх иһинэн ытыыга, үрүҥ көмүс мэтээллэри Айсен Матвеев уонна Сааскылаана Олесова ылбыттара.

Барыта, бу тыҥааһынаах успуорт көрүҥэр кыттыыны ылбыттара дойду 30 эрэгийиэниттэн 400 кэриҥэ спортсмен, ол иһигэр 21 киһи Саха сириттэн.

 

Тарҕат:

Санааҕын суруй

Бүтэһик сонуннар