Киир

Киир

От ыйын 27 күнүттэн атырдьах ыйын 8 күнүгэр диэри Владивосток куоракка Норуоттар икки ардыларынааҕы VII-с «Азия оҕолоро» успуорт оонньуулара ыытыллыахтара. Манна 10 дойдуттан 1650 оҕо  успуорт 19 көрүҥэр күрэхтэһиэхтэрэ.

«Азия оҕолоро» норуоттар икки ардыларынааҕы кэмитиэт пресс-сулууспата иһитиннэрбитинэн, олимпийскай оонньуу чөмпүйүөнэ Татьяна Горбунова быйылгы оонньууларга сүрүн судьуйанан анаммыт.

Биллиилээх гимнастка «Азия оҕолоро» оонньууларга быһаччы сыһыаннаах. Кини Посол үрдүк аатын сүгэрин таһынан, 2012 уонна 2016 сыллардааҕы оонньуулары тэрийсибитэ.  2016 с. Дьокуускайга буолбут VI-с оонньууларга  кини художественнай гимнастика сүрүн судьуйатын солбуйааччытынан үлэлээбитэ.

Gorbunova

Татьяна Игоревна судьуйалыыр уонна тэрийэр үлэҕэ улахан уопуттаах. Кини - Бүтүн Арассыыйатааҕы таһымнаах судьуйа уонна Бүтүн Арассыыйатааҕы художественнай гимнастика федерациятын вице- бэрэсидьиэнэ. Үгүс дьон кинини 2008 с. Пекиҥҥэ буолбут XXIX-с сайыҥҥы  олимпийскай оонньууларга кыайыылаах, Аан дойду 3 төгүллээх чөмпүйүөнүн, Европа 2  төгүллээх чөмпүйүөнүн, Арассыыйа успуордун үтүөлээх маастарын быһыытынан билэллэр.

Саҥа анаммыт сүрүн судьуйа: - «Азия оҕолоро» оонньуулара успуорт олоҕор олус улахан суолталаахтар. Манна миэхэ сүктэриллибит эппиэтинэһи үтүө суобастаахтык толорорго, мөккүөрдээх түгэн үөскээтэҕинэ, сөптөөх быһаарыыны ыларга кыһаллыам. Билиибэр-көрүүбэр эрэнэбин, - диэн санаатын үллэстибит.   

САНАТАН ЭТЭР БУОЛЛАХХА:

Норуоттар икки ардыларынааҕы «Азия оҕолоро» успуорт оонньуулара онньуулар түөрт сылга биирдэ ыытыллаллар уонна кыһыҥҥы, сайыҥҥы диэҥҥэ арахсаллар. Оонньуулары 1996 сыллаахха Олимпийскай хамсааһын 100 сылыгар анаан Саха Өрөспүүбүлүкэтин маҥнайгы бэрэсидьиэнэ Михаил Николаев иилээн-саҕалаан тэрийбитэ. Успуорт оонньууларын уотун үгэс быһыытынан Саха сиригэр Өлүөнэ очуостарыгар уматаллар. Быйыл уоту уматыы  бэс ыйын 24 күнүгэр буолбута. Уоту айаннатыы Туймаада ыһыаҕар саҕаламмыта. Бэс ыйын 27 күнүгэр Владивосток куоракка тиийбитэ.

Хаартыска: «Азия оҕолоро» норуоттар икки ардыларынааҕы кэмитиэт пресс-сулууспата

Тарҕат:

Санааҕын суруй