Киир

Киир

Баччааҥҥы дылы  Мииринэй улууһа хоруона хамсыгын бохсууга саамай бэлэмнээхтэрэ уонна биир эриэ-дэхси туруктаахтара этэ. Балаһыанньаны ньиэп-гаас үлэһиттэрэ, кэлии дьон буортулаатылар.

Бэс ыйын 4 күнүгэр Мииринэй улууһун дьаһалтатын баһылыга Р.Н.Юзмухаметов “Алмаастаах кыраай” тэлэ-араадьыйа хампаанньатыгар анаабыт брифинигэр эппитинэн, балаһыанньабыт мөлтөөбүт.

Ол курдук, оройуон кулубата биллэрбитинэн, «Зарница» көстүүнэйгэ түһэ сыппыт 3 “Газпром-Полярье” үлэһитигэр коронавирус инфекцията булуллан, олору кытары 5 киһи быһаччы алтыспыта биллэн, бу тэрилтэ харантыыҥҥа сабылынна.

Эмиэ ити курдук, биир киһи хоруона хамсыгар анаалыһа бигэргэтиллэн уонна 4 киһи эмискэччи сэбиргэхтэтэн, Аммосов аатынан уулусса 28 №-дээх, икки этээстээх мас, уопсай дьиэ сабылынна. Олохтоохтор бу уопсай дьиэттэн быгыалыыр кыахтара суох. Бородуукталарын, табаардарын, эмтэрин-томторун билэр дьоннорунан уонна волонтердарынан тастарыахтарын наада.

Эмиэ биир бөрүкүтэ суох сонун. «Чоппууска» дьыссаат үлэһитэ эмискэччи тымныйан ыалдьыбытыттан сылтаан, оҕо уһуйаана, бэс ыйын 4 күнүттэн сабылынна. Ыалдьыбыт дьахтар доруобуйатын туругунан инфекционист-эмчиттэр дьарыктаналлар.

Дьэ ити курдук, урут да эппитим курдук, Мииринэй кэлии-барыы, баахта куората буоларыттан сылтаан итинник түбэлтэлэр таҕыстылар.

Аны Мииринэй куорат олохтооҕо, авиатор идэлээх киһи, ньиэп-гаас киинигэр – «Сургутнефтегаз» хампаанньаҕа, Таалакааҥҥа баран сутуллан кэлбитэ. Киниттэн кыра оҕо сутуллан ыарыйда.

Станислав Алексеев, Мииринэй куората. Ааптар хаартыскалара.

 

Тарҕат:

Санааҕын суруй

Бүтэһик сонуннар