Билигин эдэр дьон, куйаар ситимин баһылаан, араас ситимҥэ олороллор, биир саастыылаахтарын кытта алтыһаллар. Тэбэнэт ааҕааччыларыгар анаан инстаграмҥа* (Арассыыйаҕа бобуулаах) биллэр-көстөр эдэр дьон олохторуттан үтүө сонуннары сырдатабыт. Ким туох ситиһиилээҕий? Тугу үлэлиир-хамсыыр, айар-тутар?
Green Apelsin (Анжела Жиркова)
Green Apelsin – бу кини ыллыыр аата. Сөбүлүүр фруктатын уонна ыллыыр бөлөҕүн ааттарын аттарбыт. Анжела номнуо 14 сааһыттан бу ааты псевдоним оҥосторго санаммыт. Кини куолаһын Арассыыйа дьоно барыта сөбүлээн истэллэр, сэҥээрэллэр. Кэрэ эйгэлээх кыыс муусукаҕа үлүһүйэр, муусука оскуолатыгар фортепиано кылааһын бүтэрбит. 16 сааһыгар “Что меня ждет” диэн ырыаны ыллаабытын Арассыыйа аатырбыт “Russian Singers” паблига бэлиэтии көрөн, дьон дьүүлүгэр таһаарбыта. 2021 сыллаахха “Хотугу тыал” диэн бастакы альбомун таһаарбыт. “Охота на лисицу” диэн ырыата YouTube балаһааккатыгар үс ый иһигэр 1 мөл. тахса көрөөччүлэммит. Ырыалара дириҥ ис хоһоонноохтор, ыччакка эрэ буолбакка, киһиэхэ барытыгар чугастар. Былырыын Анжела ийэ буолбута. Тус олоҕун ханаалыгар сырдаппат.
Поряжа (Григорий Порядин)
Инстаграм* уонна твиттер* хонуутугар Поряжаны билбэт киһи аҕыйаҕа буолуо. Кини инстаграмыгар* 20,8 тыһ. сурутааччылаах. Онно күннээҕи буолбут араас күлүүлээх биидьийэлэри устар, бэйэтэ сөбүлээн көрбүт киинэлэрин, ырыаларын истэргэ сүбэлиир. Мукбанг (аһылыгы биидьийэҕэ устуу) диэн челленджи Саха сиригэр бастакынан киллэрбитэ. Билигин “Inda show” диэн бэйэтин бырайыагын YouTube ханаалга ыытар.
Ананас (Анастасия Дьяконова)
Билигин киһи барыта блог арыныан, ыытыан сөп – баҕалаах эрэ буол. Ол эрээри Сахабыт сиригэр бастакынан суолу тэлбит блогердар бааллар диэххэ сөп. Кинилэртэн биирдэстэрэ – Тоҕус Томтордоох Чурапчы кыыһа Анастасия Дьяконова-Ананас. Кини тэттик биидьийэлэрин куйаар ситимигэр 38,8 тыһ. киһи сэргээн көрөр. Блогерга бастакы холонууларын 2–с кылаастан саҕалаабыт. 2018 сыллаахтан күүскэ үлэлэһэн барбыт. Кэлиҥҥинэн Анастасия блогер эрэ буолбакка, араас хайысхаҕа барытыгар холонон көрөр. Ол курдук, “Кандидат”, “Хапсыһыы” диэн киинэлэргэ уһуллубута. Маны таһынан “Umnullubat live” диэн Дьокуускайга ыытыллар кэнсиэргэ ыытааччы да оруолугар холонон көрбүтэ. Уопсайынан, Анастасия сатаабата диэн суох!
Ия Никифорова
Ия, визажист буолан, сирэйи-хараҕы тупсаҕайдык оҥорорун таһынан араас бүрүчүөскэни оҥорор. Билигин – урбаанньыт, бэйэтэ солуоннаах. Тус сирэйигэр сирэй-харах оҥостор малы-салы быһаарар, туох-хайдах туттуллуохтааҕын кэпсиир. Ийэ буолан, эдэр ийэлэргэ араас сүбэни, оҕо мала-сала, таҥаһа-саба ханна атыыланарын суруйар.
Владимир Дормидонтов
Хомусчут, вайнер, блогер Владимир Дормидонтов хамсык кэмигэр ордук биллэн барбыта. “Шкандалина”, “Һүөгэй тыллаах Һүөдэр” уонна да атын күлүүлээх уобарастарын дьон-сэргэ сөбүлээбитэ. Владимир Сунтаар Хаданыттан төрүттээх. Оҕо эрдэҕиттэн хомус тардар. “Дьиҥэр, доҕотторбун күллэрээри, аан бастаан кинилэргэ анаан устубутум. Онтон ким эрэ “репостаан”, тарҕанан барбыта,” – диэн Владимир кэпсиир. Кэлин инстаграмҥа* Кытай атыылааччытын уобараһа бэккэ табыллан, блога иккис тыыннанна диэххэ сөп.
Иванна Павлова
“Киһи биир сиргэ тэпсэҥнээн хаалбакка, өрүү сайдан иһиэхтээх” диэн санаалаах Иванна Павлова диэн айар куттаах уонна талааннаах кыыс. Кини хаартыскаҕа түһэрээччи уонна визажист быһыытынан үлэлиир. Ол иннинэ тас дойдуларга тууру тэрийэр этэ. Иванна омуктуу холкутук саҥарарын, аныгылыы көрүүлээҕин, сөбүлүүр дьыалатыгар бэриниилээҕин ааҕааччылара олус биһирииллэр. Үлэһит кэрэ куо дьарыга манан эрэ бүппэт, өссө сибэкки маҕаһыынын аспыта.
Александр Берзюков
Ураты көрүүлээх Александр Берзюков Мэҥэ Хаҥалас улууһун Лоомтука нэһилиэгиттэн төрүттээх. Кыра эрдэҕиттэн үҥкүүгэ дьарыктанар. “Завод” диэн үҥкүү устуудьуйатыгар уһуйуллубут. Инстаграмыгар* 15,8 тыһ. сурутааччылаах. Кини 4 сыл курдук маҕаһыынын ситиһиилээхтик үлэлэппитэ. Александр былырыын улахан тэрээһиннэргэ барытыгар кыттыбыта. Холобур, “Лапта гейм” уонна “Ыллаа” бырайыактарга дьон болҕомтотун ылыан ылбыта. Александр, ардыгар төрөөбүт дойдутугар -- Лоомтукаҕа -- тиийэн, тыа сирин олоҕун көрдөрөр.
Айыына Слепцова
Үүнэр көлүөнэ тыйаатырын артыыһа, эдэр ийэ Айыына Слепцова --дьоҕурун өрүү сайыннарар, сырдыкка, кэрэҕэ талаһар киһи. Былырыын кини кыттыылаах “Мой парень – Айдол” диэн киинэ сүрэхтэммитэ. Оттон дьиэҕэ олорор кэмигэр Айыына блогун сайыннарар, араас биидьийэни устар.
Гаврил Менкяров
Киинэ уонна тыйаатыр артыыһа Гаврил Менкяров – өссө биир интэриэһинэй уонна талааннаах киһи. Эдэр ыаллар оҕолорун сахалыы иитэллэрэ, кыра саастарыттан ырыаҕа-тойукка сыһыараллара кэрэхсэбиллээх. Маны таһынан Гаврил, өссө аҕыйах сөкүүндэлээх көрүдьүөс вайнары устан, ааҕааччыларын бэркэ сэргэхситэр.
Юлия Голикова
Юлия Голикова – Таатта улууһун Ытык Күөл нэһилиэгин олохтооҕо, эдэр ийэ. Сайын ахсын оҕуруот аһын олордон дьиэлээхтэрин күндүлүүр. Ас олордор ньыматын интэриниэт ситимигэр таһааран, дьону-сэргэни сэргэхситэн, блогер аатын сүктэ. Ол курдук, Юлия блогар араас оҕуруот аһын астыыр ырысыаптарын, күннээҕигэ туттуллар ас арааһын сурутааччыларыгар сырдатар. Куйаар ситимигэр баар сирэйин сэмээр арыйан көрдөххө, урукку кэм, ийэлэрбит, эбэлэрбит эдэр эрдэҕинээҕилэрэ көстөр.
Сахаайа Гоголева
Сахайаа Гоголева – “Три кита” диэн эрэкэлээмэ ааҕыныстыбатын салайааччыта. Улахан тэрээһиннэри, ол иһигэр күрэхтэһиилэри ыытар дьарыктаах. Ол курдук, “Мисс Новая Якутия” диэн кэрэ куолар куонкурустарын тэрийбиттэрэ. Тэрээһиҥҥэ аатырбыт ырыаһыт, Арассыыйа эстрадатын сулуһа Дима Билан ыллаабыта.
Николай Түгэн
Хаартыскаҕа түһэрэр идэлээх Николай уруу тэринээри сылдьар эдэр дьоҥҥо сүбэлэрин элбэх киһи сэҥээрэр. Уруу тэрээһиннэрин хаартыскаҕа түһэрэр буолан, куораппыт хайа муннугар кырасыабай сир-уот баарын, хаартыскаҕа хайдах туттан-хаптан түһүөххэ сөбүн ыйар, сүбэлиир. Маны таһынан хаартыскаҕа түһэриигэ саҥа дьарыктанан эрэр дьоҥҥо туһалаах сүбэлэри биэрэр, уопутун үллэстэр.
***
Ити курдук, өрөспүүбүлүкэ дьоҕурдаах ыччаттара бииртэн биир талааннарын сайыннаран, биир саастыылаахтарыгар үтүө холобур буолаллар. Онон ордук эдэр дьон биһириир блогер идэтин биһиги да ыччаттарбыт холкутук баһылаабыттар диэххэ сөп.
*Арассыыйаҕа бобуулаах, экстремист тэрилтэнэн биллэр Мета хампаанньа бас билиитигэр баар.
Балаһаны Татьяна ЖАНЧИКОВА бэлэмнээтэ.
