Арассыыйа алмаастаах киин куоратыгар тутулла турар саҥа салгын пуордун үлэтин 80%-на түмүктэммит. Пуорт былаан быһыытынан 2027 сылга арыллыахтаах. Ол туһунан АЛРОСА генеральнай дириэктэрэ Павел Маринычев салгын пуордун комплексын эбийиэктэрин тутуутугар сылдьан эттэ.
Салгын баксаалын комплексын уонна пуорт үлэлиир-тэхиньиичэскэй территориятын эбийиэктэрин тутуу 80%-на, оттон территорияны тутуу-тупсарыы үлэтэ 60%-на түмүктэммит. Салгын пуордун Мииринэй куораты кытта ситимниир саҥа айан суолун тутуутун 95%-на бүппүт. Пуорт территориятыгар хомунаалынай ситим уонна уот лииньийэтэ толору тардыллыбыт.
“Бырайыак тутуутугар федеральнай тэрилтэлэр ыкса үлэлэһэллэр. Тоҕо диэтэххэ, салгын баксаалын сэргэ саҥа көтөр-түһэр балаһа эмиэ оҥоһулла турар. Биллэрин курдук, көтөр-түһэр балаһаны тутууга сир ириитигэр уонна сир аннынааҕы ууга сыһыаннаах кэккэ кыһалҕалар бааллара. Түгэни туһунан, технология саҥа быһаарыыларын туһунан сири тоҥорорго үлэлэспит кэллиэгэлэрбитигэр махтанабыт. Бүгүн кыраапыгы көрбүппүт, барыта этэҥҥэ, табыллан иһэр. Быйыл көтөр-түһэр балаһа уонна салгын баксаалын үлэтин-хамнаһын барытын түмүктүүр уонна кэлэр сыл бастакы кыбартаалыгар сертификацияны ааһан көтөр көҥүлү ылар былааннаахпыт. Эргэ эбийиэктэр турбут сирдэригэр сир баайын хостуохпут. Тоҕо диэтэххэ, ол анныгар бэрт үчүгэй алмаас саппааһа хараллан сытар. Ол биһиги оҥорон таһаарыыбыт бырагырааматыгар киирэ сылдьар”, – диэн Павел Маринычев кэпсиир.
Эбийиэктэр бүддьүөт уонна бүддьүөтү таһынан киирэр үп күүһүнэн тутулла тураллар. Холобур, федеральнай бүддьүөт аэродром инфраструктуратын эбийиэктэрин, ол иһигэр көтөр хонуу (көтөр-түһэр балаһаны, салайар суоллары, салгын суудуналарын перронун), тутуутун үбүлүүр. Оттон салгын баксаалын комплексын, инженернэй ситими, пуорка тиийэр суолу хампаанньа бэйэтин харчытынан оҥорор. Уопсайынан, тутуу аҥаарын АЛРОСА үбүлүүр.
Урут федеральнай бүддьүөттэн үбүлэнэр, “Ространсмодернизация” ФХТ сакааһынан тутулла турар көтөр хонуу кэккэ учаастактарын анныгар ирбэт тоҥ ирэн эрэрэ биллэн, тутуу тохтуурга, үлэ түмүктэниэхтээх болдьоҕо сыҕарытыллан биэрэргэ күһэллибитэ. Билигин аныгы тэхиньиичэскэй ньымаларынан ирбэт тоҥ тэмпэрэтиирэтигэр дьайар кыах көстөн, кыһалҕалаах учаастактарга үлэ барда: 8 тыһыынчаттан тахса дьыл кэмиттэн көрөн сири тымнытар тэриллэр турдулар. Ити ньыма көмөтүнэн үлэ сөргүтүллэн, сыл бүтүөр диэри көтөр-түһэр балаһа, салайар суоллар уонна перрон бетоннанан бүтүөхтээх.
Мииринэй урукку салгын пуордуттан үс килэмиэтирдээх сиргэ саҥа салгын пуордун тутуу 2021 сыллаахха саҕаламмыта. Саҥа бырайыак чэрчитинэн барыта 2860 миэтэрэ усталаах уонна 44 миэтэрэ кэтиттээх, II таһымнаах ИКАО сырдатар-биллэрэр тэриллэринэн хааччыллыбыт көтөр-түһэр балаһа, араас таһымнаах 18 суудуна тохтоон турар перрона уонна икки салайар суол оҥоһуллуохтаахтар. Итини сэргэ чаас иһигэр 300 айанньыты (150 көтөн кэлээччи уонна 150 көтөн барааччы) аһардар кыахтаах салгын баксаалын комплекса, 1700 туонна көтөр суудуна уматыгын харайар сапыраапка комплекса, тиэйэр-таһар терминал, ангар комплекса, саахалтан быыһыыр ыстаансыйа уонна да атын эбийиэк тутулла турар
Аэродром саҥа комплекса тутуллан үлэҕэ киирдэҕинэ, Мииринэйдээҕи-Ньурбатааҕы байытар кэмбинээт “Водораздельные галечники. Залежь Основная” диэн барыта 4,2 мөлүйүөн караат саппаастаах алмаастаах сиргэ ылсан, билигин туттулла турар көтөр-түһэр балаһа анныгар, үлэлээн, сир баайын хостоон барыахтаах. Ол түмүгэр 2028 сылтан 3-с №-дээх байытар кэмбинээт сылы эргиччи үлэлиир (билигин алтынньы-кулун тутар), саҥа дьону үлэҕэ ылар кыахтаныахтаах.
АЛРОСА пресс-сулууспата
