Саха сирэ – ирбэт тоҥноох, уйаара-кэйээрэ биллибэт киэҥ дуоллаах, халыҥ буор араҥатын анныгар дьиҥнээх күндү баайы – алмааһы, ювелирдар олус сыаналыыр араас күндү таастарын – кистээн сытар ураты дойду. Ол гынан баран, Саха сиригэр дьиҥнээх айылҕа алмааһын тутан туран көрбүт киһи ахсааннаах буолуохтаах. Онон сибээстээн, СӨ Судаарыстыбаннай күндү баайын харалтата (Гохран РС(Я)) АЛРОСА хампаанньаны кытта ураты алмаас кэллиэксийэтин хаҥатан, бэрт сотору кэминэн өрөспүүбүлүкэ олохтоохторун уонна ыалдьыттарын көрүүтүгэр таһаарар былааннаах.
Олунньу ортотугар СӨ Күндү металларга уонна күндү таастарга судаарыстыбаннай пуондата СӨ Ил Дархана Айсен Николаев 2025 сыллаахха кулун тутар 11 күнүгэр таһаарбыт дьаһалын чэрчитинэн, АЛРОСА хампаанньаттан ураты алмаастары атыылаһан кэллиэксийэтин хаҥатта.
“Биһиги хампаанньабыт булбут сэдэх уонна дьикти-ураты алмаастара сотору-сотору “Сокровищница Якутии” быыстапкаҕа турааччылар. Ол ураты таастары Саха сирин Судаарыстыбаннай күндү баайын харалтата АЛРОСА Кэлим батарар тэрилтэтин исписэлиистэрин кытта бэрт кыһамньылаахтык сүүмэрдииллэр, – диэн АЛРОСА генеральнай дириэктэрэ, Арассыыйа Массыынаны оҥорооччуларын сойууһун бүрүөтүн чилиэнэ Павел Маринычев кэпсээтэ. – Быйыл биһиги АЛРОСА Кэлим батарар тэрилтэтин 30 сылын бэлиэтиибит. Онон сибээстээн, эспиэрдэрбит биир дойдулаахтарыгар уонна өрөспүүбүлүкэ ыалдьыттарыгар анаан Саха сирин баайын-дуолун көрдөрөр, ханнык да бэйэлээх аан дойду таһымнаах түмэли киэргэтиэн сөптөөх олох ураты кристаллары сүүмэрдээн ыллылар”.
Айылҕа дьикти оҥоһуга
Пуондаҕа кэпсээбиттэринэн, быйыл өрөспүүбүлүкэ АЛРОСА-ттан бэрт сэдэх уонна ураты быһыылаах-таһаалаах, ону тэҥэ араас өҥнөөх таастары атыыласпыт: толбоннуран көстөр халлаан күөхтэн, саһархайдыҥы от күөхтэн саҕалаан кугастыҥы араҕаска тиийэ өҥнөөхтөрү.
“Хас биирдии кристалл – бэйэтэ туспа ускуустуба айымньыта, айылҕа киһиэхэ анаан оҥорбут бэлэҕэ. Кристалл көмөтүнэн айылҕа тыыннаах уонна туох эрэ кистэлэҥнээх кэрэтэ арыллар. Ол Сахабыт сирин барҕа баайын туоһулуур ураты алмаастары СӨ Күндү баайын харалтатыгар өрөспүүбүлүкэбит олохтоохторо уонна ыалдьыттара көрүөхтэрэ.
Өрөспүүбүлүкэбит Күндү баайын харалтатын пуондатын салгыы хаҥатыахпыт, АЛРОСА-ттан сэдэх алмаастары эбии атыылаһыахпыт”, – диэн СӨ Үпкэ миниистирин эбээһинэһин толорооччу Иван Алексеев кэпсээтэ.
Хас эмэ сүүһүнэн алмаас ортотугар дьон болҕомтотун ордук дьикти, сороҕор олох ураты быһыылаах алмаастар тардаллар. Оннук таастары үксүгэр кинилэр быһыыларынан-таһааларынан көрөн сүрэхтииллэр.
|
|
|
|
|
|
Интэриэһинэй чахчы:
Саха сиригэр сэдэх уонна дьикти өҥнөөх алмаастар сүрүннээн АЛРОСА хампаанньа иһинэн үлэлиир “Анаабыр алмаастара” тэрилтэ үлэлиир түөлбэлэриттэн көстөллөр.
Холобур, 4,48 караат ыйаа-һыннаах, олох ураты быһыылаах “АЛРОСА бэлиэтэ” алмаас АЛРОСА хампаанньа логотибын санатар. “Затмение” диэн кистэлэҥнээх ааттаах таас таһыччы ураты өҥнөөх, хайдах эрэ күн өлүүтүн санатар курдук. Оттон 0,92 карааттаах алмаас иннэ курдук дьикти быһыылаах.
|
|
|
“Сокровищница” пуондата айылҕа баай фантазиятынан чочуйбут алмаастарынан хаҥаабыт: “Игирэлэр” – 6,33 карааттаах алмаастар; “Юла” – юла оонньуур курдук быһыылаах, 2,36 карааттаах; “Чэчик” – быыкаа сибэккини санатар, 1,67 карааттаах; “Ымыы” – үс муннуктуу быһыылаах, былыргы ымыыны санатар таас, 1,09 карааттаах; “Кусчаан” – кус оҕотун курдук, 1,02 ыйааһыннаах; “Непара” – бэйэлэригэр дьүөрэтэ суох таастар сыстыспыттара, 23,26 карааттаахтар; “Сүрэх” – үкчү сүрэх курдук быһыылаах, 1,65 карааттаах; “Сулус” – бэрт мааны киэргэл буолуон сөптөөх алмаас, 0,71 карааттаах; “Саппыкы” – саппыкы курдук моһуоннаах, 0,45 карааттаах; “Павлин куорсуна” – иһигэр павлин куорсуннарын санатар ойуулаах, 0,21 карааттаах. Ураты болҕомтону кубтуу быһыылаах таастар ылаллар. Олортон саамай улаханнара – “Куб 60”, 60 карааттаах бөдөҥ алмаас.
«Глаз-алмаз»
Аан бастаан ураты быһыы-лаах алмаастары АЛРОСА Кэлим батарар киинин исписэлиистэрэ сүүмэрдээбиттэрэ. Ол курдук кинилэр хас да сыл устата 320-чэ ураты быһыылаах тааһы мунньубуттара. Онтон үгүс таас билим үлэһиттэрин сэҥээрдиэн сөп. Исписэлиистэр хас биирдии ураты экземпляры чинчийбиттэрэ, эспиэрдэр олору сыаналаабыттара, анаалыстаан көрбүттэрэ. Дьиҥэр, оннук үлэни барытын аныгы технология түргэнник оҥоруон сөп эрээри, киһи кыраҕы хараҕын, баай уопутун билиҥҥитэ ханнык да тиэхиньикэ солбуйар кыаҕа суох.
|
Куб 60 |
|
“Биһиги үлэбит аҥаардас наардааһынынан, көрдөрүүнэн уонна атыынан муҥурдаммат. Билим уонна үөрэх эйгэтигэр эмиэ болҕомтобутун уурабыт. Ураты быһыылаах уонна сэдэх өҥнөөх күндү таастар биһиги планетабытыгар мөлүйүөнүнэн сыллар анараа өттүлэригэр туох буолбутун кэпсиэхтэрин сөп. Оттон ураты уонна хатыламмат тааһы билигин даҕаны киһи эрэ буолар кыахтаах: эспиэр – алмааһы наардааччы. Төһө даҕаны билигин автоматизация толору киирэн турдар, массыына ааҕар-суоттуур киэбэр алмаас эрэ барыта сөп түбэспэт. Онон массыына үлэ “харатын” оҥорбутун кэннэ, бүтэһиктээх сыанабылы син биир тыыннаах дьон биэрэллэр”, – диэн АЛРОСА КБК сүрүн эспиэрэ Людмила Демидова кэпсиир.
АЛРОСА КБК сүүмэрдээбит кэллиэксийэтин сорҕото 2022 сыллаахха Саха АССР төрүттэммитэ 100 сыллаах үбүлүөйүн чэрчитинэн быыстапкаҕа турбута. Ол сэдэх алмаастар билигин даҕаны учуонайдары, ойууһуттары, дизайнердары уонна кэрэни сыаналыыр бар дьону айарга-тутарга көҕүлүүллэр. Оттон сотору кэминэн ол ураты таастары баҕалаах эрэ барыта СӨ Күндү баайын харалтатыгар кэлэн илэ көрүөн сөп буолуо.
kyym.ru
