АЛРОСА хампаанньа 2025 сыллаахха көстүбүт, ювелирнай хаачыстыбалаах, 81,96 карааттаах алмааһын “Профессор Рево Скрябин” – уһулуччулаах тэрийээччи, учуонай уонна уһуйааччы, Саха өрөспүүбүлүкэтигэр инженернэй үөрэхтээһини тэрийбит киһи – аатынан сүрэхтээтэ.
Рево Миронович Скрябин 1936 с. Мэҥэ Хаҥалас улууһун Бүтэйдээх сэлиэнньэтигэр төрөөбүтэ. Ленинградка Г.В. Плеханов аатынан хайа институтугар “Туһалаах сир баайын чинчийиигэ хайа инженерин тиэхиньикэтэ” идэни бтүтэрэн баран, Саха судаарыстыбаннай университетыгар үлэҕэ киирбитэ (СГУ, билигин – М.К. Аммосов аатынан ХИФУ). Рево Скрябин Саха сиригэр инженернэй үөрэхтээһини биир бастакынан төрүттээбитэ. Кини биэс төгүллээн СГУ инженернэй факультетын деканынан быыбардаммыта, геология-чинчийэр факультетын саҥалыы тэрийбитэ.
Рево Скрябин инженер билимигэр уонна уһуйааччынан барыта 67 устатыгар үлэлээбитэ, 4 тыһыынчаттан тахса геолог-иженери, буурдааччыны, геофизигы, хайа инженерин, тутааччыны уонна ньиэп үлэһитин бэлэмнээн таһаарбыта. 180-тан тахса билим, үөрэх үлэтин, ол иһигэр учуобунньугу, бэлэмнээбитэ. Билигин кини М.К. Аммосов аатынан ХИФУ-га Сиртэн хостонор туһалаах баай технологиятын уонна тиэхиньикэтин кафедратын салайар, университет биир үтүөлээх уонна ытыктанар профессора.
Олунньу 16 күнүгэр Рево Миронович 90 сааһын бэлиэтээбитэ. АЛРОСА генеральнай дириэктэрэ Павел Маринычев эҕэрдэ тылыгар 2025 сыллаахха Накыынтан көстүбүт алмааска кини аатын иҥэрбиттэрин иһитиннэрбитэ. Ону таһынан, кини Рево Мироновичка сир баайын чинчийиигэ саҥа арыйыылары киллэрбитин, бырамыысыланнас араас салаатыгар саҥа каадырдары иитэн-үөрэтэн таһаарбытын иһин махтаммыта.
“Эн үтүөҕүнэн-өҥөҕүнэн Саха сирин инженердэрин элитэтэ үүнэн-үөскээн таҕыста, кини кэлэр кэскилэ түстэннэ”, – диэн телеграммаҕа суруллар.
Аата иҥэриллибит алмаас сэртипэкээтин уонна куопуйатын Рево Мироновичка Дьокуускай куоракка АЛРОСА бэтэрээннэрин ассоциациятын бэрэссэдээтэлэ Василий Курнев туттарбыта.
kyym.ru
