Кулун тутар 19 күнүгэр Дьокуускайга уһулуччулаах судаарыстыбаннай уонна бэлитиичэскэй диэйэтэл, саха омук үрүҥ тыынын өллөйдөөбүт улууканнаах киһи Илья Егорович Винокуров аатын кэриэстээтилэр, пааматынньыгар сибэкки уурдулар. Быйыл тохсунньу 1 күнүгэр кини төрөөбүтэ 130 сыл туолла.
Дьоро тэрээһиҥҥэ өрөспүүбүлүкэ салалтатын аатыттан Ил Дархан уонна бырабыыталыстыба дьаһалтатын салайааччыта, Илья Винокуров үбүлүөйдээх тэрээһинин иилиир-саҕалыыр хамыыһыйа бэрэссэдээтэлэ Георгий Михайлов кытынна.
Пааматынньыкка сибэккини Нам, Чурапчы улуустарын, Дьокуускай куорат салайааччылара, уопсастыбаннас бэрэстэбиитэллэрэ, Ил Түмэн дьокутааттара, ыччат дьон, оскуола үөрэнээччилэрэ уонна Илья Егорович уола, авиация бэтэрээнэ, Үлэ Килбиэнэ уордьан кавалера Валерий Винокуров уурдулар. Нам улууһун баһылыга Юрий Слепцов И.Е. Винокуров үбүлүөйдээх сылынан сибээстээн үгүс тэрээһин былааннанарын этэн туран: “Илья Егорович өрөспүүбүкэ сайдыытыгар, саха норуота тыыннаах хааларыгар сүдү кылааты киллэрбитэ. Кини аатын үйэтитэргэ, кини туһунан өйдөбүлү ыччакка тиэрдэргэ күүскэ үлэлиибит”, – диэтэ.
Илья Егорович Винокуров өрөспүүбүлүкэ бастакы салайааччылара М.К. Аммосов, П.А. Ойуунускай, И.Н. Барахов, С.М. Аржаков үтүө доҕордоро, биир санаалаахтара этэ. Кини олоҕун, үлэтин-хамнаһын бүүс-бүтүннүү норуотугар, бар дьонугар анаабыта, судургута суоҕа. Кини өрөспүүбүлүкэ сайдыытыгар киллэрбит кылаата тугунан да кэмнэммэт. Илья Егорович 1920-с сс. Булуҥҥа сэбиэскэй былааһы олохтообута, 1934 с. Өлөөнү төрүттэспитэ. Доруобуйа харыстабылын наркомнунан үлэлии олорон улуустарга дьыспаансырдары, сонотуоруйдары арыйан сэллиги утары күүстээх үлэни ыыппыта.
Кини норуот дьылҕатын түстүүр быһаарыныылары сэрии сылларыгар ыллыммыта. Замредынан, онтон Саха АССР Совнаркомун бэрэссэдээтэлинэн үлэлии олорон, араас харгыһы-моһолу, туорайдаһыыны аахсыбакка, хоргуйан өлөнөн эрэр, уһугулаан сытар саха норуотун быыһаабыта, дойду кииниттэн ас-таҥас кэлэрин, холкуостаахтар иэстэрэ сотулларын ситиспитэ. Күүс өттүнэн хоту көһөрүллүбүт чурапчылары дойдуларыгар төннөрөн киһи-хара гыммыта.
Аҕа дойду сэриитин кэннэ обком бастакы сэкирэтээринэн үлэлии олорон саха литэрэтиирэтин төрүттээбит үс киһи – Кулаковскай, Софронов уонна Неустроев – литературнай нэһилиэстибэлэрин бэйэтин кэрэйбэккэ көмүскээбитэ, Аммосов, Барахов, Ойуунускай үтүө ааттарын хараардартан батынан, хара өлүөр диэри кырдьыгы өрө туппута. Онон бар дьон өйүгэр-санаатыгар кини кырдьыксыт, үтүө сүрэхтээх, илэ-чахчы Норуот киһитэ диэн өйдөбүл хаалбыта.
Билигин кини аатынан өрөспүүбүлүкэ хас даҕаны улууһугар-куоратыгар уулусса баар, Намҥа педогогика колледжа ааттаммыта. Дьокуускайга уонна Намҥа пааматынньыктара тураллар.
Бэй.кэр.
Хаартыска: Саргын Скрябин/СИА.
