Бэс ыйын 1 күнүгэр, Оҕо көмүскэлин күнүгэр, оскуолаҕа киирэ илик оҕолор тэрилтэлэригэр “Көмүс дорҕоон” аркыастыр кэлэктииптэрин өрөспүүбүлүкэтээҕи күрэҕин гала-кэнсиэрэ буолла.
Бу чаҕылхай тэрээһин Саха сирин араас муннугар олорор эдэр талааннары түмэр түмүктүүр бырааһынньык буолла. Дьиҥэ, өссө 2023 сылтан саҕаламмыта: АЛРОСА хампаанньа уонна СӨ Үүнэр көлүөнэтин тус сыаллаах пуондатын өйөбүллэринэн “Лаборатория детства” АНО ГРД оскуола иннинээҕи саастаах оҕолорго “Ырыа ыллааһын”, “Алыптаах муусука”, “Муусука үстүрүмүөннэригэр оонньооһун” сахалыы тылынан үөрэх-мэтиэдьикэ босуобуйатын сүрэхтээбитэ. Хомуурунньуктарга саха мелодистарын 336 ырыалара, Саха сирин биллэр композитордарын 61 айымньылара, хомуска уонна төрүт үстүрүмүөҥҥэ оонньуурга үөрэтэр мэтиэдьикэ, ону таһынан саха худуоһунньуктарын иллюстрациялара түмүллэн киирбиттэрэ. Босуобуйалары өрөспүүбүлүкэ уһуйааннарыгар бэлэх быһыытынан босхо тарҕаппыттара.
Бу мэтэдьиичэскэй босуобуйаларга олоҕуран, “Көмүс дорҕоон” күрэх тэриллибитэ. Быйыл муус устарга кэтэхтэн ыытыллыбыт түһүмэххэ 125 уһуйаан, 300 эдэр мусукаан уонна 30 аркыастыр кэлэктиибэ кыттыбыта.
– Биһиги бу күрэҕи тэрийбиппит номнуо үс сыл буолла. Күрэх финалын мэлдьи маннык улахан кэнсиэринэн түмүктүүбүт. Ааспыт сылга Оржоникидзе болуоссатыгар тэрийбит эбит буоллахпытына, быйыл ону өссө ааһа түһэн, “Туймаада” стадиоҥҥа ыыттыбыт. “Лаборатория детства” ураты ис хоһоонноох, бэрт интэриэһинэй, сэргэх үс үөрэх-мэтиэдьикэ босуобуйатын таһаарда. Быйыл түмүктүүр түһүмэххэ 125 уһуйаан кыттыбытын, финалга күүстээхтэн күүстээхтэр, чаҕылхайтан чаҕылхайдар тахсыбыттарын аахтахха, биһиги билиҥҥи кэмҥэ олус наадалаах босуобуйаны оҥорбуппут диэн, киэн туттабыт. Босуобуйаларбыт саха муусукатын сайыннарар уонна оҕолор талааннарын уһугуннарар-чочуйар сыаллаахтар, – диэн бырайыак салайааччыта, “Лаборатория детства” АНО ГРД дириэктэрэ Юрий Семёнов санаатын үллэһиннэ.
“Көмүс дорҕоон” устуоруйата СӨ Бастакы Бэрэсидьиэнэ М.Е. Николаев көҕүлээбит “Музыка для всех” киэҥ далааһыннаах бырайыагын кытта ситимнээх. “Музыка для всех” – Саха сирин араас саастаах оҕолоругар муусука үөрэҕин тарҕатар-сайыннарар сыаллаах улахан таһымнаах бырайыак.
Күрэх кыайыылаахтара Улахан оҕолор бөлөхтөрүгэр:
Гран-при – “Майатааҕы оҕону сайыннарар киин – “Кэнчээри” уһуйаан” оскуола иннинээҕи үөрэхтээһин тэрилтэтин аркыастырын кэлэктиибэ (дириэктэр – Екатерина Петровна Романова, Мэҥэ Хаҥалас улууһун Майа сэл.)
I истиэпэннээх лауреат (“Төрүт дорҕоон” хайысха) – “Оҕону сайыннарар киин – “Хатыҥчаана” 1-кы №-дээх уһуйаан” оскуола иннинээҕи үөрэхтээһин тэрилтэтин аркыастыра (сэбиэдиссэй – Александра Геннадьевна, Нам улууһун Аппааны сэл.)
II истиэпэннээх лауреат (“Саха сирин композитордарын айымньыларын толоруу” хайысха) – “Тускул” оскуола иннинээҕи саастаах оҕону сайыннарар киин (сэбиэдиссэй – Аида Петровна Местникова, Нам улууһун Кириэс Кытыл сэл.)
“Бэлэмнэнии” бөлөххө:
Гран-при – “Сулусчаан” уһуйаан” оскуола иннинээҕи саастаах оҕолор фольклорнай кэлэктииптэрэ (сэбиэдиссэй – Елена Титовна Алексеева, Таатта улууһун Ытык Күөл сэл.)
I истиэпэннээх лауреат (“Төрүт дорҕоон” хайысха) – “Кэрэчээнэ” 70-с №-дээх уһуйаан кэлэктиибэ (сэбиэдиссэй – Галина Семёновна Николаева, Хатас сэл.)
I истиэпэннээх лауреат (“Саха сирин композитордарын айымньыларын толоруу” хайысха) – “Оҕону сайыннарар киин – “Сандаара” 2-c №-дээх уһуйаан” аркыастырын кэлэктиибэ (сэбиэдиссэй – Надежда Егоровна Маркова, Нам улууһун Аппааны сэл.)
I истиэпэннээх лауреат (Саха сирин мэлэдьиистэрин айымньыларын толоруу” хайысха) – “Олимпионик” Төҥүлүтээҕи оҕону сайыннарар киин (сэбиэдиссэй – Галина Анатольевна Стручкова, Мэҥэ Хаҥалас улууһун Төҥүлү сэл.)
III истиэпэннээх лауреат (“Саха сирин мэлэдьиистэрин айымньыларын толоруу” хайысха) – “Мичийээнэ” 1-кы №-дээх уһуйаан (сэбиэдиссэй – Елена Михайловна Табунанова, Нам улууһун Кыһыл Сыыр сэл.)
“Бастыҥ салайааччы” анал ааты Капиталина Семёнова (“Кэрэчээнэ” уһуйаан, Мэҥэ Хаҥалас) уонна Антонина Сизых (“Парус” 89-с №-дээх уһуйаан, Дьокуускай) ыллылар.
– Биһиги оҕолору хомус тардарга 2014 cылтан үөрэтэбит, күн бүгүнүгэр диэри төрүт үстүрүмүөннэргэ оонньуурга дьарыктыыбыт. Оҕолорбут кыра саастарыттан саха муусукатын күүһүн, кэрэтин, кыаҕын билэ улаатыахтарын баҕарабыт. Биһиги иитиллээччилэрбит аан маҥнай “Туймаада” стадион сыанатыгар таҕыстылар. Бу тэрээһин биһиги үтүө үгэспит буолуо диэн эрэллээхпит, – диэн Таатта улууһун Ытык Күөл сэл. “Сулусчаан” уһуйаанын муусукаҕа салайааччыта Галина Дуюкова санаатын үллэһиннэ.
 |
 |
Күрэх кыттааччыларыгар барыларыгар кыайыылаахтар дьупулуомнарын, мусукаалынай куубактары уонна АЛРОСА, “Алмаасэргиэнбаан”, Үүнэр көлүөнэ пуондатын ааттарыттан бэлэх туттардылар. Педагогтар дьупулуомнарынан, педагогическай уопуттарын тарҕаталларын туоһулуур сэртипикээттэринэн, оттон иитээччилэр эдэр талааннары өйүүллэрин, киэҥ эйгэҕэ тахсалларыгар көмөлөһөллөрүн иһин “Билинии” (“Признание”) сэртипикээттэринэн бэлиэтэннилэр. Оҕолор АЛРОСА Экологическай кииниттэн “Колодец сказок” кинигэни тутан үөрдүлэр. Бу кинигэҕэ дойдубут араас муннугар олорор оҕолор айбыт остуоруйалара талыллан киирбиттэр.
Дьүүллүүр сүбэ састаабыгар бааллар: Анна Афанасьевна Федулова – дьүүллүүр сүбэ бэрэссэдээтэлэ, З.П. Винокуров аатынан Намнааҕы оҕо мусукаалынай оскуолатын преподавателэ (Нам улууһун Нам сэл.), Мария Кимовна Иванова – педагогика билимин хандьыдаата, М.К. Аммосов аатынан ХИФУ педагогическай институтун “Оскуола иннинээҕи үөрэхтээһин” кафедратын дассыана, Анна Ивановна Томская – “Кыл Саха” этническэй муусука ансаамбылын салайааччыта, С.А. Зверев-Кыыл Уолун аатынан Үҥкүү тыйаатырын аркыастырын артыыһа, Майя Владимировна Степанова – С.Ф. Гоголев аатынан Дьокуускайдааҕы педагогическай колледж преподавателэ уонна концертмейстера.
Күрэх тэрийээччилэрэ “Лаборатория детства” АНО ГРД, Нам улууһун үөрэҕин управлениета, Нам улууһун Ымыйахтаах сэлиэнньэтин “Чуораанчык” уһуйаан буоллулар.
Түмүккэ бииргэ үлэлэспит партнёрдары бэлиэтиир оруннаах: СӨ Үөрэҕин министиэристибэтэ, СӨ Култууратын уонна духуобунай сайдыытын министиэристибэтэ, СӨ Үүнэр көлүөнэтин пуондата, “Николаев-киин” – Саха сирин Бастакы Бэрэсидьиэнэ М.Е. Николаев бибилэтиэкэ-архыыба, В.А. Босиков аатынан СӨ Муусука үрдүкү оскуолата, С.Ф. Гоголев аатынан Дьокуускайдааҕы педагогическай колледж, М.Н. Жирков аатынан Дьокуускайдааҕы мусукаалынай колледж (училище).
kyym.ru
