“Ньыгыл Арассыыйа” уопсастыбаннай өйөбүлүн ыстааба “Утум-Наследие” кэмиэрчэскэйэ суох тэрилтэлиин бииргэ үлэлэһии сөбүлэҥин түһэристэ.
Бэс ыйын 23 күнүгэр Дьокуускайга Уопсастыбаннай кииҥҥэ (Курашов уул. 24) “Алмаас саас – Алмазное долголетие” өрөспүүбүлүкэтээҕи сугулаан буолуоҕа. Бу киэҥ далааһыннаах тэрээһиҥҥэ кыттааччылар өрөспүүбүлүкэ бары улууһуттан кэлиэхтэрэ.
“Биһиги доруобуйа харыстабыла, дьиэ кэргэн, устуоруйа өйдөбүлэ курдук үлэлэһэр тутаах хайысхаларбытыгар биир көрүүлээх буоламмыт, сөбүлэһии түһэрсэргэ сананныбыт. Сугулаан чэрчитинэн пленарнай мунньаҕы сэргэ үс дьыалабыай түһүлгэ тэриллиэ: көхтөөх уһун үйэлэниигэ, көрүүгэ-истиигэ уонна социальнай арыаллааһыҥҥа, көхтөөх саас кэмигэр, 50+ урбааҥҥа. Дьокуускай олохтоохторун уонна ыалдьыттарын сугулааҥҥа кыттаргытыгар ыҥырабыт. Кэлэн санааҕытын этиҥ, этиигитин киллэриҥ, көхтөөх уһун үйэлэниини көҕүлүүргэ кылааккытын киллэриҥ”, – диэн кэмиэрчэскэйэ суох тэрилтэ салайааччыта Мария Христофорова эттэ.
“Утум-Наследие” НКО көхтөөх уһун үйэлэнии сугулаанын СӨ үлэҕэ, социальнай сайдыыга, урбааҥҥа, доруобуйа харыстабылыгар министиэристибэлэрин, өрөспүүбүлүкэ уопсастыбаннай палаататын өйөбүллэринэн тэрийэр.
Сугулаан туһунан сиһилии бу сигэнэн билсиэххитин сөп.
Бэй.кэр.
