Быйыл Туймаада ыһыаҕын кэмигэр Үс Хатыҥҥа мобильнай сибээһи хааччахтыахтара. “Куораттыын быһа сибээс” биэрии кэмигэр мээр Евгений Григорьев эппитинэн, сибээс күүһэ 2G-гэ тиийэ түһүө. Бу барыта дьон-сэргэ тоҕуоруһар сиригэр куттал суоһаабатын туһугар оҥоһуллар.
Ол да буоллар, атыы-эргиэн эрээттэригэр анал Wi-Fi холбонон, баан каартатынан төлөһөргө харгыстар үөскүөхтэрэ суоҕа. Ыһыах күн дьон кэлиитэ-барыыта атахтамматын туһугар, таксии тохтуур анал сирдэрэ баар буолуохтара, уопсастыбаннай тырааныспар сырыыта элбиэҕэ.
Тэрийээччилэр сылыктыылларынан, быйылгы ыһыахха 220 тыһ. киһи кэлиэн сөп. Култуурунай бырагыраамата, үгэс курдук, алгыһынан саҕаланыа. Ону таһынан хас эмэ түһүлгэнэн фольклор, төрүт таҥас-сап, ас-үөл куонкуруһа тэриллиэ. Санаттахха, Туймаада ыһыаҕа бэс ыйын 27—28 күннэригэр буолар.
