Дьокуускайга Судаарыстыбаннай авто-иниспиэксийэ үлэһиттэригэр анаан пааматынньык туруоруохтара. Оннук быһаарыыны Дьокуускай Дууматын 26-с мунньаҕар дьокутааттар таһаарбыттар. Таас монумент Ленин бэрэспиэгин 7-с нүөмэрдээх дьиэтин иннигэр турар буолбут.
Пааматынньык прототиба – Саха сирин ГАИ-тын номоххо киирбит үлэһитэ, Аҕа дойду Улуу сэриитин бэтэрээнэ Дмитрий Николаевич Алексеев. Кини өрөспүүбүлүкэ киин коуратыгар бэрээдэги-быраабы хааччыйыыга, суолга-иискэ куттал суох буолуутугар кырата суох кылааты киллэрбит киһи.
Кини 30-тан тахса сыл устата Дьокуускай саамай сырыылаах уулуссатын кэрчигин – Аммосов уонна Ленин уулуссаларын быһа охсуһуутун – хонтуруолугар үлэлээбитэ. Саха сиринээҕи ГАИ үлэһиттэриттэн биир даҕаны милииссийэ Д.Н. Алексеев курдук анал сыһыарыллыбыт учаастага суоҕа. Онон кинини өссө ааспыт үйэ 70-с сс. “бэрэспиэк хаһаайына” диэн сүрэхтээбиттэрэ. Ону тэҥэ дьон-сэргэ киниттэн толлон, “ВОДКА” диэн ааттыыра. Ол эбэтэр, ити аббревиатура “Водитель, Осторожно! Дорогу Контролирует Алексеев!” диэн тылбаастанар.
