АЛРОСА генеральнай дириэктэрэ Павел Маринычев Саха Өрөспүүбүлүкэтин олохтоохторун Үрүҥ Тунах Ыһыаҕынан эҕэрдэлээтэ.
Бу түҥ былыргыттан силис тардан кэлбит бырааһынньык саҥа олоҕу, киһи айылҕалыын алтыһыытын уонна үтүө өрөгөйүн бэлиэтиир. Ыһыах – көннөрү бырааһынньык буолбатах, бу – саха кичэллээхтик харыстыыр, көлүөнэттэн көлүөнэҕэ тиэрдэр норуотун кута-сүрэ, кини үйэлэри уҥуордаан кэлбит култуурата, өркөн өйө. Сайын күн муҥутаан тыгар кэмигэр сир ураты эниэргийэнэн туолар, оттон сүрэхпит – үөрүүнэн уонна эрэлинэн.
Быйылгы ыһыах биир ураты бэлиэтэ диэн, 2026 сылы Саха сирин Ил Дархана Айсен Николаев Саха Өрөспүүбүлүкэтигэр Култуура сылын биллэрбитэ буолар. Култуура диэн – бу биһиги ураты нэһилиэстибэбит, кини норуот хатыламмат уратытын бөҕөргөтөр уонна уопсастыба духуобунай сиэрин-майгытын сайдыытын акылаата буолар. Ол да иһин биһиги үгэстэрбитин, төрөөбүт тылларбытын, дьарыкпытын, ЮНЕСКО киһи аймах матырыйаалынайа суох нэһилиэстибэтин кылаан чыпчаал айымньытынан билиммит Олоҥхобутун харыстыырбыт уонна тарҕатарбыт олус улахан суолталаах. Онон 2026 сыллааҕы Ыһыах Култуура сылыгар ананыа уонна бу бэлиэ сыл биир саамай добун түгэнэ буолуо.
АЛРОСА хампаанньа өрөспүүбүлүкэ эрэллээх партнера буоларынан, үгүс сыллар тухары кини сайдыытыгар кылаатын киллэрэр. Биһиги оҥорон таһаарыыны сайыннарарбыт таһынан, Саха сирин култуурунай нэһилиэстибэтин харыстыырга эмиэ улахан болҕомтобутун уурабыт. Биһиги социальнай бырайыактары өйүүбүт, оскуолалары, уһуйааннары, мэдиссиинэ тэрилтэлэрин уонна култуура эбийиэктэрин тутарга уонна өрөмүөннүүргэ көмөлөһөбүт. Ураты болҕомтобутун Саха сирин төрүт омуктарын тылларын уонна култуураларын харыстыырга уонна тарҕатарга уурабыт, кинигэ таһаарыыны, төрүт бырааһынньык тэрээһиннэрин уонна ыччат суолталаах көҕүлээһиннэрин өйүүбүт.
Бу Үрүҥ илгэ бырааһынньыга хас биирдии дьиэҕэ сылааһы, үөрүүнү, нус бараан олоҕу, эрэли уонна этэҥҥэ буолууну аҕаллын. Эһиэхэ уонна эһиги чугас дьоҥҥутугар чэгиэн туругу, дьолу уонна ситиһиини баҕарабын. Ийэ сирбит сиэдэрэй, байылыат буоллун, оттон дьиэ кэргэҥҥитигэр эйэ уонна ил олохсуйдун! Уруй! Айхал!
Нарыйа Пахомова хартыската
