Бэс ыйын 21 күнүгэр Нам сэлиэнньэтигэр буолбут ыһыахха “Дьиэ кэргэн” өрөспүүбүлүкэтээҕи куонкурус “Тыа сирин ыала” номинациятын кыайыылаахтарын бэлиэтээтилэр. Кыайылаахтары Ил Түмэн спикерэ Алексей Еремеев, үлэ уонна социальнай сайдыы миниистирэ Елена Волкова, улуус баһылыга Юрий Слепцов эҕэрдэлээтилэр.
Быйылгы куонкуруска 15 ыал кыттыбыт. Бастакы миэстэҕэ Чурапчыттан Иван уонна Анастасия Шоломовтар тахсыбыттар. Кинилэргэ Ил Дархан аатыттан 300 тыһыынча солкуобайы туттардылар. Иккис миэстэҕэ Нам ыала Радик уонна Матрена Лукиннар тиксибиттэр. Бириистэрэ – 200 000 солк. Үһүс Амматтан сыдьааннаах Гаврил уонна Сардаана Чемезовтар буоланнар, 100 тыһыынчанан наҕараадаламмыттар.
Оттон Уус Алдантан кэлбит Иннокентий уонна Туйаара Гороховтар уонна Намтан Семен уонна Татьяна Кривошапкиннар Нам улууһун дьаһалтатын аатыттан 50-нуу тыһыынчалаах сэртипэкээттэри туттулар.
Бу туһунан Ил Дархан уонна бырабытаалыстыба пресс-сулууспата суруйар.
