Бу күннэргэ “Туймаада-ньиэп” АУо сапыраапкаларыгар бэнсиини канистраҕа атыылаан бүттүлэр. Ол туһунан “Сахадэй” сырдатар.
Сапыраапка ситимин килиэйэннэри кытта үлэҕэ сулууспата эппитинэн, биир сырыыга киһи биир толору баах уматыгы куттара эрэ көҥүллэнэр буолбут. Канистраҕа-буочукаҕа куттар – бобуллубут.
- Ол төрүөтүн уонна хаһааҥҥа диэри оннук буолуоҕун этэр кыахпыт суох. Ол да буоллар, уматык лиитэрэтигэр лимиит диэн суох. Биир сырыыга биир толору бааҕы куттан барыахха сөп, – диэн менеджер быһаарбыт.
Бэс ыйыгар Саха сиригэр бэнсиини тиэйиигэ-аҕалыыга кэккэ кыһалҕалар үөскээбиттэрин туһунан эрдэ өссө “СибОйл” хампаанньа салайааччыта Сергей Черных эппиттээх.
Уматык дэписиитэ дойду барытын үрдүнэн тимир суол логистикатыгар үөскээбит кыһалҕалары уонна собуоттартан ньиэп бородуукталарын тиэнии аҕыйаабытын кытта ситимнээх.
