Быйыл “Краса ЖКХ” Бүтүн Арассыыйатааҕы куонкуруска Саха сирин аатын биир кыттааччы көмүскээтэ – Айхалтан Дора Данилова. Кини “Уу ситимин туһаныы уонна ититии ситимин оборудованиетын инженерэ” (квалификация алтыс таһыма) номинация кыайыылааҕа буолла.
Дора АЛРОСА самалык тэрилтэтигэр, ПТВС Айхаллааҕы отделениетыгар, үлэлиир. Кэрэ куо Таатта улууһун Чымынаайы бөһүөлэгэр төрөөбүт. Түөрт оҕолоох дьиэ кэргэн саамай кырата. 1999 сыллаахха, Дора баара-суоҕа 5 саастааҕар, төрөппүттэрэ Айхалга көһөн кэлбиттэр.
“Мин холку, элбэҕи билэр-көрөр баҕалаах оҕо этим, – диэн Дора Данилова кэпсиир. – Оскуола уонна бөһүөлэк олоҕор кырабыттан көхтөөхтүк кыттарым. Дора диэн миигин тапталлаах аҕам ийэтин аатынан сүрэхтээбит. Кини олус дьулуурдаах, амарах санаалаах, уһун суһуохтаах этэ. Ол гынан баран, дьон бары миигин дьүһүммүнэн да, майгыбынан да аҕабар ордук майгыннатар. Хомойуох иһин, кини билигин суох. Аҕам дьон ытыктыыр булчута этэ, дьоҥҥо-сэргэҕэ мэлдьи көмөлөһө сылдьара, олоҕун тухары Айхаллааҕы ХБК АТТ-1 үлэлээбитэ”.
Төһө даҕаны бүгүҥҥү доруойбут ордук аҕатыгар майгыннаатар, туох да диэбит иһин, суһуоҕа син биир эбэтин киэнэ – эмиэ оннук уһун, оннук кэрэ. Даҕатан эттэххэ, былырыыҥҥы ыһыахха Дора уһун суһуоҕунан “Уһун суһуох” номинацияҕа бастаабыт. Эмиэ ол ыһыахха “Төрүт таҥаска” кыайбыт.
Оскуоланы бүтэрээт, Дора тута Мииринэйдээҕи индустриальнай техникумҥа туттарсыбыт. “Ититиинэн хааччыйыы уонна ититии оборудованиета” идэтин баһылаан баран, Айхаллааҕы ХБК-ҕа термоизоляцияҕа бүрүйээччинэн (изолировщик) үлэлии киирбит. Икки сыл буолан баран кинини ПТВС-ка энергонадзор сулууспатын маастарынан көһөрбүттэр, онтон ТВК учаастагын маастарынан, ол кэннэ 2018 с. ТВК салайааччытынан анаабыттар.
“Изолировщигынан үлэлии сылдьан тыйыс көрүҥнээх дьиҥнээх эр дьону салайыам дии санаабат этим, – диэн Дора кэпсиир. – Мин сөптөөх быһаарыыбыттан сылаас баар-суох буолара, үлэһиттэрим соругу төһө хаачыстыбалаахтык уонна түргэнник толороллоро тутулуктаах. Мин санаабар, бу дуоһунаска сөп түбэһэбин. Тоҕо диэтэххэ, быһаарыыны ылынар кэммэр бэйэбэр олус ирдэбиллээхпин, тулалыыр дьону өйдүүргэ дьулуһабын уонна настаабынньыктар муударай этиилэрин мэлдьи истэбин”.
Дора Данилова үлэтин туһунан кылгастык кэпсээтэххэ, кини уу сүүрүүтүн уонна ититии ситимин тохтоло суох үлэтин хааччыйар. Ону таһынан, бүгүҥҥү дьоруойбут өссө учаастак оҥорон таһаарар хаһаайыстыбаннай үлэтин салайар, былаанныыр, тэхиньиичэскэй докумуону бэрийэр.
“Краса ЖКХ” куонкуруска Дора дьон этиитинэн кыттыбыт. Сайаапкатын, көрдөрөр презентациятын уонна анкыататын идэлээх сойууһун бэрэстэбиитэлин кытта бэлэмнээн ыыппыт. Куонкурус дьиэ-уот-хомунаалынай хаһаайыстыбатын комплексын тэрилтэлэрин үлэтигэр-хамнаһыгар уонна муниципальнай тэриллиилэргэ хомунаалынай хаһаайыстыбаҕа дьахталлар оруолларын көрдөрөр аналлаах. Онон, бастатан туран, кыттааччылар көстөр дьүһүннэрэ буолбакка, кинилэр үөрэхтэрэ, уопуттара уонна сатабыллара сыаналанар.
Дора иллэҥ кэмин дьиэ кэргэнин кытта атаарарын сөбүлүүр. Кини бөһүөлэк тэрээһиннэригэр көхтөөхтүк кыттар, успуорт, айар-тутар дьоҕур куонкурустарын сөбүлүүр, саха төрүт үҥкүүтүнэн дьарыктанар. Дора олус кэрэ, кыраһыабай кыыс. Дьиҥнээх Айхал бирилийээнэ!
Ыспыраапка:
“КРАСА ЖКХ” – дьиэ-уот-хомунаалынай хаһаайыстыбатын эйгэтин үлэһиттэрин аатын-суолун үрдэтэргэ, бастыҥ исписэлиистэри быһаарарга, кинилэр ситиһиилэрин тарҕатарга анаммыт киэҥ далааһыннаах эйгэ куонкуруһа. Куонкурус дьиэ-уот-хомунаалынай хаһаайыстыбатын комплексын тэрилтэлэрин үлэтигэр-хамнаһыгар уонна муниципальнай тэриллиилэргэ, хомунаалынай хаһаайыстыбаҕа дьахталлар оруолларын көрдөрөр соруктаах. Куонкуруска идэ маастарыстыбата сыаналанарын таһынан, идэлэрин туһунан сырдаталларыгар тирэх буолар, хандьыдааттар тутта-хапта сылдьар, этэр-тыынар сатабыллара эмиэ учуоттанар.
Быйылгы куонкуруска дойду 49 эрэгийиэниттэн 587 сайаапка киирбит. Силиэсэртэн, сыбаарсыктан саҕалаан инженергэ, салайар хампаанньа салайааччытыгар тиийэ араас идэлээх кэрэ куолар кыттыбыттар.
Дарья ЛАПШИНА
Хаартыска: Дора Данилова тус архыыба
