Бу субуотаҕа, ол эбэтэр от ыйын 25 күнүгэр, “Туймаада” стадиоҥҥа куорат култуурунай олоҕун сэргэхситэр киэҥ далааһыннаах “Ykt Fest” бэстибээл буолуоҕа. Саха сирин араас муннугуттан 10 000-тан тахса араас саастаах, биир интэриэстээх дьону түмүөҕэ.
Күнүс 12 чаастан саҕаланар. Күн устата стадиону толору көр-нар тардыллыаҕа: 60-тан тахса атыыһыт кыттыылаах гаражнай дьаармаҥка, сынньалаҥ сирдэрэ, маастар-кылаастар, быыстапкалар, ырыа-тойук, фудкорт. Бэстибээл партнердара бэйэлэрин промозоналарын, былаһааккаларын билиһиннэриэхтэрэ. Манна куонкурустар, оонньуулар ыытыллыахтара, сыаналаах бириистэр оонньонуохтара.
Ону таһынан, Ykt бэстибээл ыалдьыттарыгар 3000-тан тахса бэлэҕи түҥэтиэҕэ.
Кырачаан ыалдьыттарга аралдьытар-дьарыктыыр былаһааккалар баар буолуохтара. “Бэби Сити” улахан былаһаакканы бэлэмниэҕэ, “Клерки” маҕаһыын остуол оонньууларын тэрийиэҕэ, "Akvagrim.ykt” босхо аквагрим оҥорон оҕолору үөрдүөҕэ. Сөҕүмэр улахан дженга, шашка, “морской бой”, батут баар буолуохтара. Кырачаан оҕолордоох ийэлэргэ туспа сынньалаҥ хоһун бэлэмниэхтэрэ. Оҕо былаһааккаларыгар босхо киллэриэхтэрэ.
Киэһэ 18 чаастан саха эстрадатын ырыаһыттара кыттыылаах босхо кэнсиэр буолуоҕа. Teteeki, Yoppa, Happy Chuck, Нарияна Куо, Invent, Өркөн, Варя Ларионова, Умсуура, Игорь Егоров, «Букет бумажных цветов», Nuyrga, Erkhaan, Ankharov, Kakitoka, Моисей Кобяков, Виталий Очиров, «Муравейник», Tyas-Uus, Mans, Sergee, Ponsash, Fiesta, Кэскил Баишев, Руслан Очиров, Айкуо, Alyona ID, Altan Kyyha, Lilis, Архан Уйгу, “Гонки на санках” уо.д.а. кыттыахтара.
“Ykt Fest” бырагыраамата:
12:00 – бэстибээл саҕаланар, DJ-сет;
13:45-17:45 – ырыа-тойук, үҥкүү-битии, фокусник Дьулустаан Павлов шоута, көрөөччүлэргэ араас күрэхтэр;
17:45-18:00 – Ykt сервистарын эҕэрдэтэ;
18:00-21:00 – саха эстрадата кыттыылаах улахан кэнсиэр.
Киирии – босхо. “AfishaYkt” сыһыарыыга эрдэттэн регистрацияланар ирдэнэр.
Бэстибээл туһунан сиһилии иһитиннэриини https://yktfest.ru саайка билсиҥ.
kyym.ru
