Атырдьах ыйын 7 күнүнээҕи туругунан, Саха сиригэр 114 тыһыынча туонна оту кэбистилэр, 200 туонна сенаһы бэлэмнээтилэр. Сиилэһи өссө даҕаны уга иликтэр.
Улуус баһылыктара бырабыыталыстыба бэрэссэдээтэлин солбуйааччыта Сергей Местниковы кытта от үлэтин уонна сүөһү кыстыгын туһунан мунньахтаатылар.
“Сайыммыт судургута суохтук саҕаламмыта: уһун ардах түмүгэр үгүс улууска ходуһа ууга барбыта. Былырыыҥҥы кыраапыктан хаалан иһэр түгэннэрбит бааллар. Балаһыанньа тыҥааһыннаах эрээри, үлэлиибит. Уустук кэмҥэ өрөспүүбүлүкэ олохтоохторо хардары көмөлөсүһэр үгэстээхтэр. Ордук киин улуустар атын улуустары отунан хааччыйарга үлэлэһиэхтээхтэр. Сүрүн сорукпут – кыстыкка кыһалҕата суох киирэр туһугар, оппут сыллааҕы былаанын 90—100% толоруу”, – диэн Сергей Местников эттэ.
Тыа хаһаайыстыбатын миниистирин солбуйааччы Сахаяна Павлова бу күннэрдээҕи балаһыанньаны сырдатта.
Кини этэринэн, быйыл 2025 с. бу ыйынааҕы көрдөрүүтүттэн хаалан иһэбит. Былырыын атырдьах ыйын саҥатыгар 148 тыһ. туонна от кэбиһиллибитэ. Ол сүрүн төрүөтэ – 15 улууһу таарыйбат от ыйынааҕы халаан. Саамай уустук балаһыанньа Үөһээ Дьааҥыга үөскээн турар.
От үлэтигэр бастыҥ көрдөрүүлээх улуустар: Мэҥэ Хаҥалас – 15 612 туонна (былаан 35%-на), Чурапчы – 14 847 туонна (37%), Үөһээ Бүлүү – 11 793 туонна (46%), Уус Алдан – 10 204 туонна (33%). Амма, Бүлүү уонна Сунтаар 8,7—9,1 тыһыынчалаах кирбиини куоһарбыттар.
Халаантан эмсэҕэлээбит хаһаайыстыбалары өйүүргэ мобильнай биригээдэлэри тэрийэр туһунан кэпсэтэллэр. Онно анаан барыллаан 37,5 мөл. солк. эрдэттэн көрүллүбүт. Сергей Местников тыа хаһаайыстыбатын министиэристибэтигэр хомуур уонна от үлэтин улуустары кытта кыраҕытык хонтуруоллуу олороругар сорудахтаата. Өтөр эбии үбүлээһин мэхэньиисимэ быһаарыллыа диэтэ.
Санаттахха, быйыл 423,7 тыһыынча туонна от кэбиһиллиэхтээх, 29,9 тыһыынча туонна сиилэс угуллуохтаах уонна 14,75 тыһыынча туонна сенаж бэлэмнэниллиэхтээх.
