Чурапчы сэлиэнньэтигэр бөһүөлэк ортотунан ааһар Куохара үрэх кытылын тупсаран оҥороллор. Бырайыак Уһук Илин муниципальнай тэриллиилэрин ортотугар ыытыллар Бүтүн Арассыыйатааҕы куонкуруска кыайбыт. Бырайыагы олоххо киллэрэргэ федеральнай бүддьүөттэн 50 мөл. солк. көрүллүбүт. Бу туһунан Саха.гов.ру суруйар.
Куонкурус “Олох инфраструктура” национальнай бырайыак “Табыгастаах куорат эйгэтин тэрийии” федеральнай бырайыагын чэрчитинэн тэриллибит.
Куохара саҥа кытылыгар дьон сынньанар, успуордунан дьарыктанар, дьиэ кэргэнинэн дьаарбайар, култуура тэрээһиннэрин ыытар түһүлгэлэр оҥоһуллуохтаахтар. Бырайыагы оҥорорго улуус устуоруйатын, култууратын уонна уратытын – бүтүннүү учуоттаабыттар.
Үлэ бу саас муус устар 28 күнүттэн номнуо саҕаламмыт. Билигин сири-уоту былаанны, буор-кумах тиэйэ-таһа, уу-хаар сүүрэр холлорооннорун оҥоро сылдьаллар. бырайыак үлэтэ-хамнаһа эһиил алтынньы 1 күнүгэр түмүктэниэхтээх.
