Айыы Тойон Таҥара уонна Дойду иччитэ Аан Алахчын Хотун салайар Ийэ айылҕабыт уһуктар. Сайын кэлиитин, саха Саҥа сылын, саха Төрөөбүт күнүн, Дьылы тахсан күөххэ үктэниини, Сайылык күнүн бэлиэтээн, сыл бастакы Ыһыаҕын ыһар Ытык Ыам ыйа үүммүтүнэн, Саха кэрдииһинньигинэн сыл саҕаланар бастакы ыйа үүннэ.
Саха омукка итинник сүдү, бэлиэ Ыйы, улахан суолта биэрэн, Айыы Тойон Таҥара бэйэтинэн Дойдубут Иччитэ Аан Алахчын Хотуну кытары кыттыһан салайаллара биһиэхэ ордук үөрүүлээх уонна үрдүк эппиэтинэстээх.
Билигин социальнай ситимнэргэ Ыам ыйын Иэйэхсит ыйа диэн суруйаллар. Ол гынан баран, Тэрис уонна сорох тылдьыттарга Иэйэхсит диэн суруйбуттарын да иһин, тыл быраабылатын быһыытынан, Иэйиэхсит диэн суруллара сөп. Ити бастакытынан.
Иккиһинэн, Иччилэрбит Орто Дойду олоҕун салайсыыга кыттыгастаахтарын ханна да ахтыбаттар. Ону Таҥарианство итэҕэлэ Иччилэргэ суолта биэрэн, Үөһээ Айыылары кытары Ый уонна Сыл аайы уочаратынан Орто Дойду олоҕун салайсаллар диэн дьон болҕомтотугар тириэрдэр.
Сыл саҕаланыыта хаһан баҕарар уһулуччу ссуолталаах кэм. Ону Аан дойдуну айбыт Аҕа Таҥарабыт уонна киниэхэ көмөлөһөн Ийэ айылҕабыт, Дойдубут Иччитэ Аан Алахчын Хотун салайаллара ордук оруннаах.
Таҥарианство итэҕэлин быһыытынан Иэйиэхсит Хотун Тиэргэнэй Тойону кытта кыттыһан Бэс ыйын салайыахтара.
Балаһыанньаттан көрөн быйыл Үгэс быһыытынан Ыам ыйын бүтэһик Быыһык күнүгэр 29 чыыһылаҕа Саха Саҥа сылын, Саха Төрөөбүт күнүн, Сайылык күнүн бэлиэтиир Ыһыах ыһар баҕа баар.
Ол баҕабыт туоларыгар Айыы Тойон Таҥара көмөлөһүө диэн эрэнэбит.
Үүммүт Ытык ыйбытыгар бары чэгиэн-чэбдик, Дьоллоох-соргулаах буолуоҕуҥ!
Тускуо!
