«Кыым.ру» аан ситим Саха сиригэр Ийэ дойдуну көмүскээччи сылынан «Ийэ дойдуга тапталы – ийэ тылынан» диэн нэһилиэк туһунан ырыалары толорууга видеонан күрэс тэрийэн ыытта. Күрэскэ бөлөҕүнэн эбэтэр биирдиилээн кыттыы көҥүллэммитэ.
Кыттааччылар, нэһилиэктэрин ырыатын киэҥ эйгэҕэ тарҕата таарыччы, Дьокуускай куоракка Уһун көхтөөх үйэлэнии киинигэр нэһилиэктэрин аҕам саастаахтарыгар уон хонуктаах босхо путевкалары кыайан ылыахтарын сөп этэ. Кыттааччылар аҕыйахтарын үрдүнэн, күрэспитин түмүктээн, толорооччу куолаһын, толорор таһымын, хайдах туттарын-хаптарын сыаналаан, кыайыылаахтары быһаардыбыт.
Дьүүл сүбэтигэр киирдилэр: ырыа айааччы, СӨ норуодунай артыыһа Алексей Калининскай-Луҥха Өлөксөйө, Көхтөөх уһун үйэлэнии киинин култуура чааһыгар исписэлииһэ, СӨ үтүөлээх оһуохай этээччитэ, сцена бэтэрээнэ Евгения Игнатьева, «Кыым.ру» аан ситим эрэдээктэрэ Күндэли Нарынай удьуора. Онон, түмүк маннык буолла:
I Үрдэл – Томпо улууһун Ыҥаа нэһилиэгин Новай сэлиэнньэтиттэн «Дьиэрэй» ырыа, үҥкүү ансаамбыла. Толорбут ырыалара – «Биһиги Сайдыыбыт». Кинилэр нэһилиэктэрин аҕам саастаахтарыгар «Көхтөөх уһун үйэлэнии киинигэр» сынньанар-чэбдигирэр 10 путевканы ылаллар.
II Үрдэл – Ньурба улууһун Күндээдэ нэһилиэгин «Далбарай» ансаамбыла. Толорбут ырыалара – «Күндээдэ». Кинилэр нэһилиэктэрин аҕам саастаахтарыгар «Көхтөөх уһун үйэлэнии киинигэр» сынньанар-чэбдигирэр 7 путевканы ылаллар.
III Үрдэл – Бүлүү улууһун Баппаҕаайы нэһилиэгин «Алаһа» вокальнай ансаамбыла. Толорбут ырыалара - «Илбэҥэ». Кинилэр нэһилиэктэрин аҕам саастаахтарыгар «Көхтөөх уһун үйэлэнии киинигэр» сынньанар-чэбдигирэр 5 путевканы ылаллар.
Маны таһынан, дьүүл сүбэтэ СӨ Үлэ уонна социальнай сайдыы министиэристибэтин анал бирииһин Ньурба улууһун Сүлэ сэлиэнньэтиттэн кыттыбыт Раиса Ивановаҕа анаата. Кини бэйэтэ айбыт «Төрөөбүт түөлбэм» ырыатын толорон ыыппыта.
Маны сэргэ, Мэҥэ Хаҥалас улууһун Мөҥүрүөн нэһилиэгиттэн «Күн уоттаах Маттаҕа» ырыа матыыбын айбыт уонна тыыннаахтыы толорбут Константин Марков, Горнай улууһун Бэрдьигэстээх сэлиэнньэтиттэн «Бэрдьигэстээх кырдала» ырыаны толорбут Алыһардаах Сарыада уонна Сунтаар улууһун Элгээйи нэһилиэгиттэн «Элгээйим сиригэр» ырыаны толорбут Александр Миронов биһирэбил бириистэри тутуохтара.
Нэһилиэктэрин туһунан ырыаны киэҥ эйгэҕэ таһаарбыт, аҕам саастаахтарыгар Көхтөөх уһун үйэлэнии киинигэр путевка сүүйэргэ кыһаллыбыт кыайыылаахтарбытын уонна бириистээх кытааччыларбытын ис сүрэхпититтэн эҕэрдэлиибит уонна олоххо көхтөөх сыһыаҥҥыт иһин истиҥник махтанабыт!
