Оҕолоор, муус устар 22 күнэ – Аан дойдуга Сир күнэ! Бу күнүнэн сибээстээн, Ил Түмэн Сиргэ, сир баайыгар сыһыаҥҥа уонна экологияҕа Сис кэмитиэтин бэрэссэдээтэлэ Владимир Михайлович Прокопьев ыалдьыттыыр.
Владимир Михайлович, дорообо! Сир күнүнэн итиитик-истиҥник эҕэрдэлиибин! Бу бэлиэ күн чэрчитинэн сир туһунан кэпсэтиэх.
– Аан дойдуга биллэриллибит Сир күнүнэн Саха сирин олохтоохторун Ил Түмэн уонна туһааннаах сир боппуруостарынан дьарыктанар кэмитиэт аатыттан эҕэрдэлиибин! Биһиги, киһи аймах, сүрдээх дьоллоох дьоммут. Тоҕо диэтэр биһиги сирдээхпит. Сүрүн баайбыт, олохпут төрдө сирбит буолар. Сир диэн киэҥ уонна дириҥ өйдөбүллээх. Киһи ахсаана эбиллэ турара үчүгэй дьыала эрээри, биһиги сирбит мантан улааппат. Онон биһиги саамай сүрүн сыалбыт-сорукпут сирбитигэр харыстабыллаахтык сыһыаннаһыы буолар.
Сахабыт сирин айылҕатын, сирин туругун туһунан тугу этиэххит этэй?
– Арассыыйа үрдүнэн биир киэҥ иэннээх сир – Саха сирэ. Индия, Бразилия курдук киэҥ дойдулаахпытыттан биһиги киэн туттуохтаахпыт уонна сыаналыы, харыстыы үөрэниэхтээхпит. Биһиги олус тыйыс усулуобуйалаах дойдуга олорор буолан, айылҕабыт сүрдээх уйан. Кинини кыратык даҕаны алдьаттахха, киртиттэххэ, чөлүгэр түһэригэр уонунан сыллар наадалар.
– Аан дойду үрдүнэн айылҕаны харыстааһыҥҥа туһуламмыт сокуоннар кытаатан иһэллэрэ сөптөөх. Билигин ким даҕаны сири көҥүл киртитиэ, хорумньуну таһаарыа суохтаах. Маннык миэрэнэн сири-уоту, айылҕаны киртитии улам аччаан иһиэхтээх. Биһиги өрөспүүбүлүкэбит сокуоннарын Арассыыйаҕа күүстээх уонна хаачыстыбалаах сокуоннарынан билинэллэр. Арассыыйаҕа Экологическай доктринаны Москуба куорат кэнниттэн Саха сирэ иккис субъегынан ылынныбыт. Экологическай доктрина инники өттүгэр уһук илиҥҥи уонна хотугу эрэгийиэҥҥэ бырамыысыланнас сайдыытыгар улахан наадалаах докумуон буолла. Маны таһынан экологическай доктрина Саха сирэ 2050 сылга диэри торумнаан сайдыахтаах стратегиятын састаабыгар киирдэ.
Хас биирдии киһи айылҕаны, сири-уоту харыстыырга туох кылааты киллэриэхтээҕий?
– Мин чуолаан инники көлүөнэ ыччатыгар, оҕолорбутугар туһулаан этиэхпин баҕарабын. Харамайдартан, кыыллартан биһиги уратыбыт диэн өйдүүр, билэр таһыммыт.Саха ыччата сүрдээх дьоҕурдаах. Онон эһиги кытаатан үчүгэйдик үөрэннэххитинэ, билиигит хаҥаатаҕына, сайыннаххытына, тус бэйэҕитигэр, чугас дьоҥҥутугар уонна саха норуотугар улахан туһалаах дьон буола улаатыаххыт диэн эрэнэбин.
– Аан дойдуга Сир күнүнэн сибээстээн, Ил Түмэн дьокутаата, “Ситим” медиа-бөлөх генеральнай дириэктэрэ Мария Христофорова көҕүлээһининэн “Бэлэм буол+” оҕо хаһыатын кытта олус үчүгэй күрэс биллэрилиннэ. Бу күрэс төрүөтүнэн Надя Слепцова Индигиир өрүскэ баҕа санаатын эппит биидьийэтэ буолар. Сирбитин-уоппутун, айылҕабытын харыстыы үөрэннэхпитинэ, Сахабыт сирин айылҕата өрүү чөл буолуоҕа. Күрэскэ көхтөөхтүк кыттыҥ уонна ситиһиини баҕарабын!
“Бэлэм буол+” хаһыат эрэдээксийэтэ
Өрөспүүбүлүкэтээҕи “Сырдык баҕа санаа кыната” күрэс балаһыанньата
Күрэс тэрийээччилэрэ: ООО “Ситим” медиа-бөлөх, Ил Түмэн Сиргэ, сир баайыгар сыһыаҥҥа уонна экологияҕа Сис кэмитиэтэ, “Бэлэм буол+” оҕо хаһыата
Сыала: Оҕоҕо төрөөбүт дойдуга тапталы иҥэрии, айылҕаҕа харыстабыллаах сыһыаны иитии.
Сүрүн ирдэбилэ:
- Күрэскэ ким баҕалаах 1 биидьийэнэн кыттар.
- Кыттааччы айылҕаҕа, төрөөбүт дойдутугар баҕа санаатын биидьийэҕэ устан электроннай почтаҕа эбэтэр Инстаграм ситимҥэ ыам ыйын 27 күнүгэр диэри ыытар.
- Кыттар оҕо туһунан сиһилии ыспыраапка (кылааһа, оскуолата, улууһа, төлөпүөнэ) ирдэнэр.
Кыайыылаахтар бэс ыйын 1 күнүгэр, Оҕо көмүскэлин бырааһынньыгар, добун суруктарынан, бириистэринэн наҕараадаланыахтара. Көхтөөхтүк кыттыбыт оҕолор туоһу сурук тутуохтара. Киирбит биидьийэлэр Инстаграм ситимигэр, Кыым.ру саайтка тахсыахтара.
Эрэдээксийэ аадырыһа: Дьокуускай к., Кирова уул., 18, Бизнес-киин (“В” блок), 7 этээс, 709 хос.
Билсэр төлөпүөннэргит: 42-21-08, 34-47-40
Электроннай почта: Этот адрес электронной почты защищён от спам-ботов. У вас должен быть включен JavaScript для просмотра.
Instagram: belembuol
Оҕолоор, күрэскэ көхтөөхтүк кыттыҥ!
