Сандал саас үгэнэ. “Алмаас” култуура дыбарыаһыгар кэрэ бэлиэ тэрээһин буолан ааста. ХИФУ Мииринэйдээҕи политехническэй институтун кэрэ куотун быһаардылар.
Күрэскэ уон кыыс кыттыыны ылла: Анастасия Иванова, Юлия Донец, Диана Тихонова, Анастасия Бабушкина, Полина Каратова, Анастасия Афанасьева, Валерия Семенова, Диана Терешкина, Елизавета Яковлева уонна Диана Трушникова. Бу устудьуон кыргыттар араас улуустартан, бэл атын эрэгэйиэнтэн сылдьаллар. Холобур, Настя Иванова Сунтаартан, Валерия Семенова Үөһээ Бүлүүттэн, Анастасия Бабушкина ыраах Бүрээтийэттэн сылдьар. Күрэс суолтата кыргыттарга уһулуччулаах. Быйыл Мииринэйдээҕи политехническэй институт төрүттэммитэ 25 сыла. Онон, кыргыттар бу күннэргэ сүрдээҕин бэлэмнэммиттэрэ өтө көстөр. Баай ис хоһоонноох “шоу” былыргы Греция номохторугар олоҕурда. Устудьуоннар Греция мифтэригэр сыһыаннаах дириҥ ис хоһоонноох испэктээги көрдөрдүлэр. Мустубут дьон олус сэргэҕэлээтэ. Салгыы дьүүллүүр сүбэ араас ыйытыктарыгар эппиэттээтилэр, хореографияҕа, муусукаҕа, муодаҕа талааннарын көрдөрдүлэр. Бары кыттааччылар күрэhи кыhаллан-мүhэллэн туран түмүктээтилэр. Ону дьүүллүүр сүбэ, көрөөччүлэр да бэлиэтээтилэр. Бүтэр уhугар кыайыылаахтары быhаардылар. Ол курдук, “Иккис вице-мисс МПТИ” – Анастасия Иванова, “Бастакы вице-мисс МПТИ” – Диана Тихонова буоллулар. Оттон “Мисс МПТИ-2019” аатын Диана Трушникова ылла. Мииринэйдээҕи политехническэй интитут саамай кэрэ кыыhыгар күлүмүрдэс таастарынан симэммит хоруона уонна успуонсартан бэлэх туттардылар.
Станислав Алексеев, Мииринэй к., ааптар хаартыскалара.
