Саха сиригэр “Абилимпикс” диэн доруобуйаларыгар хааччахтаах дьон ортотугар идэ күрэҕэ бэһис төгүлүн ыытыллыа.
Быйылгы күрэх кулун тутар 1-5 күннэригэр Дьокуускайга уонна Нерюнгрига буолуоҕа. Орто үөрэх кыһаларын дьиэтигэр ыытыллыаҕа. “Абилимпикс” аан дойтутааҕы хамсааһын буолар. Күрэх сүрүн сыалынан доруобуйаларыгар хааччахтаах дьон, доруобай дьонтон итэҕэһэ суох үлэҕэ бэлэмнэрин дакаастааһын уонна кинилэр үлэ булалларыгар көмөлөһүү буолар. Күрэх аан бастаан 1957 сыллаахха Японияҕа ыытыллыбыта. Атын дойдулар уопсастыбаларын болҕомтотун киэҥник тардыбыта. Арассыыйаҕа 2001 сыл саҕаланыытыгар ыытыллан саҕаламмыта, оттон Саха сиригэр 2016 сылтан сыл аайы үрдүк таһымнаахтык ыытыллар. Былырыыҥҥы дойду таһымнаах күрэххэ Саха сирин хамаандата 4 мэтээли ылан ситиһиилээхтик кыттан кэлбитэ. Ол иһигэр, биир бастакы, икки иккис, биир үһүс миэстэни ылан өрөспүүбүлүкэ чиэһин көмүскээбиттэрэ.
Быйылгы бэһис төгүллээх күрэх кыттыылаахтара үс сааһынан: “Юниор”, “Устудьуон”, “Исписэлиис” диэн арасхан 19 идэҕэ билиилэрин, сатабылларын тургутуохтара. Ол курдук эрэгийиэн бастыҥнарын “Портной”, “Медицинский и социальный уход”, “Информационная безопасность”, “Вязание крючком”, “Предпринимательство”, “Ресторанный сервис”, “Веб дизайн”, “Прикладная эстетика”, “Социальная работа” о.д.а. быһаарыахтара. Тэрийээччилэр этэллэринэн, быйыл 150 кэриҥэ кыттааччы күрэхтэһэрэ күүтүллэр уонна 50 тахса дьүүллүүр экспертэр үлэлиэхтэрэ. Күрэх таһынан кыттааччылары профориентационнай, дьыалабыай бырагырааммалар кэтэһэллэр. Сүрүн тэрийээччилэринэн Профессиональнай үөрэх сайдыытын института, Үөрэх уонна наука министиэристибэтэ буолар.
