Араас өҥүнэн кытыаста оонньуур сибэккини улуу бэйиэттэр хоһоонноругар хоһуйаллар, ырыаһыттар ырыа нөҥүө хас биирдии истээччигэ тиэрдэллэр. Сибэккини көрбүт эрэ бары санаата көнньүөрэр. Тус бэйэм ханнык баҕарар сибэкки солуонугар сырыттахпына, бастатан туран, кыһыллыҥы өҥнөөх, олус минньигэс сыттаах оруоса сибэкки аттыгар, күннээҕи олохтон аҕыйах мүнүүтэҕэ тэйэн, таалан, иһийэн турарбын сөбүлүүбүн. Маннык кэрэ сибэккилэр биһиги күннээҕи олохпутун киэргэтэллэр, хайа да бэйэлээх санаата түспүт киһини настарыанньатын көтөҕөллөр.
Дьокуускай олохтоохторо сөбүлээн сылдьар сирдэринэн “ЗЕЛЁНЫЙ РАЙ” сибэкки солуона буолар. Биир күн ааттаан-суоллаан кэлэммин, солуону кэрийэбин, хас биирдии дьэрэкээн сибэккилэргэ чугаһаан, санаабын үллэстэбин, сирдээҕи олох кэрэ түгэнин бэлэх ууналларыгар махтанабын.
Флористика үрдүкү муодаҕа тэҥнээх
Сибэккиттэн флористика – ускуустуба биир ураты көрүҥэ буолар. Ол да сиэринэн, бу солуоҥҥа сибэккинэн араас композицияны, букеттары оҥорбуттарын икки этээһинэн кэрийэ сылдьан көрөбүн-истэбин. Иккис этээскэ сибэккилэр анаан турар, хараллар сирдэрэ аныгы ирдэбилгэ эппиэттиир килиимэккэ сыһыаннаах анал тэрилинэн хааччыллыбыт, уоттарынан сырдатыллыбыт. Онон атыылаһааччыларга хаачыстыбалаах, сибиэһэй сибэккини атыылаһалларыгар усулуобуйа олохтоммут. Эҥин бэйэлээх дьикти, дьэрэкээн дьиэ сибэккилэрэ кырыы-кырыытынан “Миигин атыылас даа-аа” диэбиттии араас өҥнөрүнэн көөчүктүү угуйаллар.
Манна дьиэ сибэккитин 100-тэн тахса көрүҥэ, оттон сибэкки дьөрбөтө 50-ча көрүҥэ баар. Ол курдук, бастакы тыллар сандал саас илдьиттэрэ, кэрэ кэми кэрэһилиир гиацинт, нарцисс, тюльпан, гербера, пион, оруоса кустук өҥнөрө, дьиэни күөх ырайга кубулутар сүүнэ күөх пальмалар, уот кыһыл азалия, маны тэҥэ таҥара ийэтигэр ууммут үтүө сурах илдьитэ, дьолу иҥэрэр аналлаах лилия бииһин ууһа, бөҕө-таҕа туруктуур каланхоя араас өҥө, көмүскүүр аналлаах алоказия, о.д.а сибэкки, үүнээйи арааһа баар. Онтон эр бэрдин, кэрэ аҥаарга дьолу аҕалар чаҕылхай кыһыл өҥнөөх антуриум сибэкки аттынан хайдах даҕаны холкутук, манньыйа көрбөккө, сыттаабакка эрэ ааспаккын.
Айар куттаах дьон үтүөнү түстүүллэр
Салон терүттээччитэ Василий Жирков уонна дириэктэр Анна Тихонова
Солуон дириэктэрэ Анна Николаевна ТИХОНОВАны көрсөн кэпсэтэбин.
– “Биһиги солуоммут 2009 сыл олунньуттан аһыллан үлэлиир. Эһиил баччаларга үлэлээбиппит 15 сыла буолуо. Бу кэм устата биһиги сибэккилэрбитин, дьөрбөлөрбүтүн сөбүлээн атыылаһар, мэлдьи сылдьар дьоннордоохпут. Сибэкки араас көрүҥэ барыта баар. Сибэккилэрбитин Арассыыйаттан уонна тас дойдулартан аҕалабыт. Бэйэм күн киирбэт Япония дойдутугар Хоккайдоҕа икебаны аныгы оскуолатыгар баран маастарыстыбабын үрдэтинэн, үөрэнэн кэлбитим.
Ханнык баҕарар түгэҥҥэ флорист уһулуччу настарыанньаны уонна ураты сибэкки композициятын оҥорон таһаарар. Хас биирдии флорист иннигэр дьону үөрдүү, интэриэһиргэтии соруга турар. Кинилэр килийиэн баҕатынан сибэкки дьөрбөтүн, композициялары оҥороллор. Сибэкки дьөрбөтүн оҥорорбутугар ханнык бырааһынньыкка, үбүлүөйгэ, сыбаайбаҕа ананарынан оҥоробут. Биһиги сибэкки композициятын эрэ оҥорор буолбатахпыт, дьоҥҥо умнуллубат кэрэ түгэни, хатыламмат көстүүнү эмиэ бэлэхтиибит. Ол курдук, Дьокуускай куорат олохтоохторугар, тэрилтэлэргэ да буоллун араас таһымнаах сибэкки композицияларын сэргэ, ханнык баҕарар тэрээһиннэри сибэккинэн киэргэтиэхпитин сөп.
Биһиги уопуттаах флористарбыт таһымнарын мэлдьи үрдэтинэллэр, араас сэминээрдэргэ, маастар кылаастарга кытталлар. Тэрилтэбитигэр үксэ айар эйгэ үлэһиттэрэ – худуоһунньуктар, дизайнердар, агрономнар үлэлииллэр. Солуоммут норуокка чугас, хас биирдии киһи судургу бүддьүөтүгэр анаммыт буолан сыанабыт удамыр. Онон манна кэлбит килийиэн бэйэтин кыаҕыттан көрөн атыылаһар усулуобуйатын тэрийэбит. Биһиги солуоммутун интэриэһиргээбиттэр “Зелёный рай” телеграм ханаалбытыгар киирэн көрүөхтэрин, билсиһиэхтэрин сөп”.
Флористика син биир үрдүкү муодаҕа тэҥнээх. Ол да сиэринэн, сибэкки дьөрбөтүн оҥорууга сыл аайы араас сонун хайысха киирэр. Ол курдук, өҥ дьүөрэлэһиитэ, араас саҥа аксессуардар. Аан дойду сибэккитин муодатыгар сонун сүүрээни французтар уонна голландецтар киллэрэллэр. Маны тэҥэ хатыламмат ураты көстүүнү дьоппуон омук икебана ускуустубата киллэрэр.
Билигин муодаҕа төрүт айылҕаттан көстүү (естественность) баар. Ол иһин аан дойду аатырбыт флористара сибэкки букетыгар төрүт айылҕаттан көстүүнү, өҥү-дьүһүнү биэрэргэ кыһаллаллар. Ол эрээри хас биирдии дойдуга, омукка сибэкки букетын оҥороллоругар омук ураты истиилин тутуһаллар. Оннук сахалыы истиили “Зелёный рай” сибэкки солуона – сибэкки угуллар сахалыы уруһуйдаах, бэйэлэрин мастарыскыайдарыгар илиилэрин сылааһынан имэриллэн-чочуйуллан тахсыбыт туойтан оҥоһуллубут көһүйэлэрэ (кашпо) буолаллар. Килээркэй (глазурь), кэрэ дьүһүннээх көһүйэлэргэ сахалыы оһуор-бичик ойууламмыта киһи дууһатын манньытар. Маннык нарын-намчы көһүйэҕэ угуллубут сүрэҕи долгутар, сылааһынан илгийэр тыыннаах сибэкки дьөрбөтүн бэлэх тутар, төһөлөөх долгутуулаах түгэни бэлэхтиирэ буолуой?!
Харах таптыы көрөр хатыламмат... сибэккиттэн композициялар, букеттар
Солуон үлэһиттэрэ анал үөрэҕи, маастар кылаастары барбыт үлэҕэ уопуттаах дьон буолалларын, хас биирдиилэрэ сибэкки дьөрбөтүн, композициятын имигэстик, сатабыллаахтык туттан-хаптан, кырасыабай бэйэлээхтик оҥорон таһааралларын интэриэһиргии көрөбүн. Суруксут буолбакка, флорист эбитим буоллар... айымньыларбын кэрэчээн сибэккилэринэн дьикти, кэрэ остуоруйа түгэнин айан таһаарыа эбиппин диэн испэр сэмээр сонньуйабын. Ол курдук умсугутуулаах эбит – сибэккини кытта “эн-мин” дэһэн алтыһыы бу кэрэ түгэнэ. Кэнники кэмҥэ Дьокуускай куорат олохтоохторо сибэккинэн эксклюзивнай композициялары өйдүүр буолан эрэллэрэ уонна онно болҕомто уурар буолбуттара үөрдэр.
Кэрэ аҥааргар бэлэҕи – “Зелёный рай” солуонтан ыларга тиэтэй!
Быйылгы сааскы бырааһынньыкка анаан “Зелёный рай” сибэкки солуона сонун, кэрэ көстүүлээх, хаар анныттан аан бастаан үүнэн тахсар (первоцветы) сибэккилэри – гиацинт (чэлгийэ сайдыыны, кыайыыны, ситиһиини түстүүр) уонна нарцисс сибэккиттэн тус-туһунан дьөрбөнү анал этии (специальное предложение) оҥорон, баара-суоҕа 350 солк. “хит сезона” оҥорон, атыыга таһаарбытын сонургуу, биһирии көрдүм. Онтон сытын туһунан этэ да барбаккын, оннук минньигэс, угуйар сыттаах...
Аҕыйах хонугунан Аан дойду дьахталларын күнүн долгуйа бэлиэтиэхпит. Эн кэргэҥҥэр, ийэҕэр, эбэҕэр, эдьиийгэр, балтыгар тугу бэлэхтиир санаалааххын? Оччоҕуна, аата да этэрин курдук, “Күөх ырай” солуонугар суолу тутус, тиэтэй, ол диэки хардыылаа! Бириэмэни ыыппакка, билигин тиий уонна эрдэттэн сакааста оҥор – сибэкки дьөрбөтүгэр, дьэрэкээн композицияҕа...
Ол туһуттан:
Бастакы хардыы: 8 914-280-05-50 бассаап нүөмэригэр толору ааккын-суолгун, хайдах букеты, композицияны сакаастыыргын суруйаҕын, төлөпүөнүҥ нүөмэрин ыйаҕын.
Иккис хардыы: Глухой переулок 2/2 (89142221664), Дзержинскэй 16/4 (89841165525), Халтурин уулусса 14/3 (8914279039) дьиэлэригэр тиийэн бэйэҕит баҕаҕытынан флористарга сүбэлэтэн, эрдэттэн сакаас оҥотторуоххутун сөп. Эн талбыт чэчигиҥ дьөрбөтүнэн эриэккэс бэйэлээх бэлэҕи тутан-хабан, хомуйа охсон биэриэхтэрэ.
Саргылаана БАГЫНАНОВА.
