Ыраах үрэх баһыгар оттуу сытабыт. Чугаһынан киһи суох. Арай хас да биэрэстэлээх сиргэ кырдьаҕас ини-биилэр бааллар. Хаһааҥҥыта эрэ геологтар туппут дьып-дьап үүтээннэрин дьиэ гынан олороллор. От ыйын ортото. Итии да итии. Биһиги, оҕолор, хаһан ардах буоларын кэтэһэбит. Наар халлааны өрө мыҥаан тахсабыт. Таайбыт хотуура көҕөрөрүн маныыбыт. Биирдэ отуубутугар тахсан чэйдии олордохпутуна ини-бииттэн биирдэрэ кэллэ. Атынан. Өҥүрүк куйааска баата чылыгырыайканан сылдьар. Ыы. Биһиги көрө-көрө эппит уута барар. Хата, кини отой да кыһаммат. Сыт-сымар да буоллар, бэрт доруобай көрүҥнээх.
Чэйдии олорон: “Көр, бу эмп бөҕөтүн буллум”, – дии-дии салапааны хостоон таһаарда. Биһиги өҥөҥнөһүү буоллубут. Салапаан иһигэр туох эрэ сүөгэйдиҥи-арыытыҥы хойуу убаҕаска кымырдаҕастар кыймаҥнаһаллар. “Бэс чагда бүтүннүү кымырдаҕас оргула. Бу саамай улаханыттан ыллым. Сүрдээх эмтээх дииллэр. Манан оҕунуохтаан имэрийдэххэ харахтан сыыһы ылбыт курдук арамачыыһы эҥин ылан кэбиһэр дииллэр”, – инньэ диэн баран, аны көрдөөн ылыахтара диэбиттии, укта охсон кэбистэ.
Кырдьык, биһиги оттуур сирбит бэстээх сиргэ баар. Ол эрээри улахан оргулу көрбөтөхпүт. Оҕонньор, арааһа, үөһэ сыырга, кураанахха, тахса сылдьыбыт быһыылаах. Кэлин билбиппит ол кымырдаҕас хайаҕа (муравьиное масло) дэнэр эбит. Дьарҕаҕа, сөтөлгө, ис ыарыытыгар тутталлар. Хайдах тутталларын билэр киһи баара буолаарай?
Егор Николаев.
