Арассыыйа үрдүк үөрэҕин кыһаларыгар туттарсыы бэс ыйын 20 күнүттэн саҕаланна. Ол курдук М.К. Аммосов аатынан ХИФУ ректора Анатолий Николаев үөрэххэ туттарсыы быйылгы сылга туох уратылааҕын, бүддьүөт миэстэлэрин уонна саамай тоҕоостоох идэлэр туһунан кэпсээтэ.
Ректор этэринэн, 2023 с. уопсайа 4436 бүддьүөт миэстэтэ көрүллүбүт, мантан 3144-дэ бакалавриакка уонна специалитекка, 345 орто профессиональнай үөрэхтээһиҥҥэ уонна 947 магистратура, аспирантура, ординатура хайысхаларыгар анаммыт. Маны таһынан, университекка Украина, ДНР, ЛНР, Запорожье уонна Херсон уобаластарыгар сылдьыбыт байыаннай сулууспалаахтар оҕолоругар уонна РФ Дьоруойа аатын эбэтэр "Эр санааланыы" уордьанын үстэ ылбыт байыаннайдар оҕолоругар былырыыҥҥыттан көрүллэр туспа квоталар быйыл эмиэ бэриллэллэр. Быйыл манна анаан 369 миэстэ ууруллубут. Абитуриент киирии тургутуктары сэргэ тустаах биэдэмистибэттэн ыспыраапка аҕалара ирдэнэр.
Быйыл абитуриеннар ханнык үөрэхтэргэ туттарсыахтарын баҕаралларын барытын биир сайабылыанньаҕа суруйаллар. Бакалавриакка, специалитекка биэс хайысханы, магистратураҕа үс хайысханы талыахха сөп.
ХИФУ абитуриеннара мэдиссиинэ, педагогика, уопсастыбаннай уонна IT-идэлэри биһирииллэр эбит. Ол курдук, «фундаментальная информатика и информационные технологии»; «информатика и вычислительная техника», «юриспруденция»; «реклама и связи с общественностью»; «лечебное дело»; «стоматология»; «прикладная математика и информатика»; «педагогическое образование» хайысхалар тоҕоостоохтор.
Үөрэххэ киирэргэ докумуону тус бэйэҥ университет сүрүн куорпуһугар кэлэн эбэтэр Киин приемнуур хамыыһыйа саайтыгар тус кэбиниэтинэн нөҥүө онлайн туттарыахха сөп.
Фото: Нарыйа Чурукова
Бэйэ кэр.
