Көрүөх бэтэрээ өттүгэр сонуну-нуомаһы сири-сибиири сиксигинэн тэнитэ охсор бассаап ситиминэн бэҕэһээ киһи эрэ астына көрөр хаартыскалаах, бэртээхэй сонун тилийэ көттө.
Ол курдук, Сунтаар улууһун Бордоҥ нэһилиэгин ытык-мааны ыаллара, 14 оҕону күн сиригэр көрдөрөн көччөх гынан көтүппүт, үлэһит үтүөтэ, дьоһуннаах дьон оҥортообут Дьоруой ийэ Галина Егоровна уонна ыал амарах аҕата Афанасий Гаврильевич Петровтар алаһа дьиэни тэнитэн, аал уоту уматан олорбуттара лоп курдук 50 сылларын, Кыһыл көмүс сыбаайбаларын бэлиэтиир дьоро күннэрэ буолан ааспыт. Ааттара-суоллара толору ыйыллыбатах, оҕолорун туһунан иһитиннэрии суоҕа. Ону, дьонтон чопчулаһан билэн, эһиэхэ үллэстэргэ сананным.
Бу сырдык, үөрүүлээх сонунтан томороон тымныылаах тохсунньу тоһуттар тымныыта мэктиэтигэр сылыйан ыларга дылы гынна. Кырдьыга да, тыа сиригэр элбэх оҕону көрүү-харайыы, хас биирдиилэригэр иһирэх тыыны иҥэрэн, таптал кутаатынан угуттаан, үөрэхтээх-билиилээх оҥоруу – бу диэн эттэххэ, туһунан сындалҕаннаах үлэ, үтүмэннээх түбүк түмүгэ.
Орто дойду олоҕо буолан баран, барыта хонуу ньуурун курдук көнө буолбат. Араас уустук, санааны сарбыйан, эрэли энчирэтэн ылар харах уулаах түгэннэр, түбүктэр да ханна барыахтарай? Бу кэмҥэ өйдөһүү, бэйэ бэйэни өйөһүү, таптал ыраас иэйиитэ өрө тутуллар түгэнигэр эрэ ыал олоҕо уһуур, үйэлээх буолар. Галина, Афанасий Петровтарга айар Айыыһыттара 11 кыталык кыыһы, 3 туруйа уолу бэлэхтээбит. Итинтэн билигин 10 оҕо олох дьолун уһансар. Ону тэҥэ 21 сиэн, 7 хос сиэн эбиллэн, эһэ-эбэ үбүлүөйдээх күннэринэн эҕэрдэлииллэр, барҕа махтал тылларын аныыллар.
Оҕолор, сүбэлэһэн баран, тапталлаах дьоннорун кырылас кумахтаах Турция үтүөкэн сиригэр сырытыннарар, сынньатар путевка бэлэхтээн үөрдүбүттэр. Сорохторо, бэйэлэрэ эмиэ арыалдьыт буолан бараары, кынаттарын куурдаллар. Петровтар оҕолоро бары да, анаабыт курдук, билиигэ-көрүүгэ тардыһыылаах, саҥаттан саҥа үрдэллэри дабайар, сайдар баҕалаахтар эбит. Сунтаарга ментальнай арифметика сайдыытыгар бу дьиэ кэргэн улахан өҥөлөөх диэтилэр. Аны, анаабыт курдук, бэртээхэй минньигэс туортары астыылларын биир дойдулаахтара киэн тутта кэпсээтэ.
Петровтар маҥнайгы хараҥаччылара Ирина Афанасьевна Матросова билигин бэйэтэ – 4 оҕолоох ыал. Бастаан Бүлүү педагогическай колледжыгар оскуолаҕа киириэн иннинээҕи саастаах оҕолору иитээччи идэтин баһылаабыт, Калмыкия Б.Б. Городиков аатынан судаарыстыбаннай университетын бүтэрэн, үрдүк үөрэхтээх иитээччи буолан, талбыт идэтигэр таһаарыылаахтык үлэлиир.
Уоллара Егор Афанасьевич алмаас кырыылааччы идэтин баһылаабыт, аармыйаҕа сулууспалаан кэлбит. Уонча сыллааҕыта, эдэркээн сылдьан олохтон туораабыт.
Иккис кыыс Евдокия Афанасьевна Егорова, эдьиийин курдук Бүлүү педучилищетын бүтэрэн баран, СГУ педагогикаҕа академиятын бүтэрбит, Казахстан Алма Ата куоратыгар “ментальнай арифметика педагога” кууруһун ааспыт. Кэлэктиибигэр сыаналанар үлэһит. Устье орто оскуолатыгар алын кылаастары үөрэтэр үрдүк категориялаах учуутал.
Анна Афанасьевна Петрова кэргэннээх, кыыс оҕолоох. Дьокуускай кэмиэрчэскэй лиссиэйигэр үөрэнэн, буҕаалтыр-экэнэмиис буолбут. СГУга инженер геолог идэтин баһылаабыт. СӨ Бэрэсидьиэнин иһинэн салайыы институтун бүтэрэн, үп менеджменэ идэни баһылаабыт. Муниципальнай салайыы, эбии үөрэхтээһин араас куурустарыгар, СХТГА кылааһы үрдэтинэр уонна каадыры бэлэмниир институтугар үөрэнэн, билии-көрүү үтүмэнин мунньуммут. Устье дьаһалтатыгар баһылык экэниэмикэҕэ солбуйааччытынан үлэлиир. 2-с кылаастаах муниципальнай сулууспа сүбэһитэ.
Бэһис оҕо Мария Афанасьевна Петрова, кэргэннээх, үс оҕолоох, СГУга ювелир дыалатын инженер-технолога идэҕэ үөрэнэн, кыһыл дьупулуомунан бүтэрбит. Эдьиийин курдук СӨ Бэрэсидьиэнин иһинэн салайыы институтугар “Судаарыстыбаннай уонна муниципальнай салайыы” идэҕэ үөрэммит. Ону сэргэ Т. Десяткин аатынан Дьокуускайдааҕы бырамыысыланнай техникуму бүтэрбит. Казахстаҥҥа ментальнай арифметика педагога диэн кууруһу ааспыт, аныгы кэм идэлэрин – кыламан оҥорооччу, перманентнай макияж куурустарын ааспыт.
Алтыс оҕолоро Зинаида Афанасьевна кэргэннээх, 4 оҕолоох. СГУну бүтэрэн, инженер-геолог идэлэммит. ХИФУга иккис үрдүк үөрэҕэр үөрэнэн, Тохтоло суох идэтийии институтун бүтэрэн, “ДОУ иитээччитэ уонна тэрийээччи методиһа” идэни баһылаабыт. Иннинээҕи улахан оҕолор курдук, ылбыт билиитинэн тохтообокко, араас куурустарга, сэминээрдэргэ тиһиги быспакка үөрэнэн, билиини сомсор. Билигин – Н.М. Родионова аатынан Сунтаардааҕы оҕо айымньытын педагога.
Сэттис оҕонон күн сирин көрбүт Людмила Афанасьевна Тертюхова, үс оҕолоох ыал. Дьокуускайдааҕы кэмиэрчэскэй лиссиэйгэ икки идэни баһылаан баран, Москубатааҕы Үлэ уонна социальнай сыһыаннаһыы Академиятыгар “Үп-харчы уонна кирэдьиит” диэн идэҕэ үөрэммит. ХИФУга “ДОУ иитээччитэ уонна тэрийээччи-методиһа” диэн иккис үрдүк үөрэҕин баһылаабыт. Петровтар үгэстэринэн, Казахстаҥҥа ментальнай арифметикаҕа уонна ону таһынан крипто-консультант диэҥҥэ үөрэнэн кэлбит. Ментальнай арифметика педагога.
Ыал күүтүүлээх иккис уола, ахсыс оҕото Владимир Афанасьевич, Мииринэйдээҕи РТК электрик идэтигэр үөрэммит. Кэргэннэммит, үс оҕоломмут. Хомойуох иһин, олохтон түөрт сыллааҕыта туораабыт.
9-с, 10-с оҕолоро, сыллата төрөөбүт кырачаан кыргыттар – Розалаах Сардаана, олус хомолтолоохтук оҕо эрдэхтэринэ, олохтон туораабыттар.
Любовь Афанасьевна Винокурова, кэргэннээх, үс оҕолоох. Идэтин орто үөрэхтэн – Профессиональнай лиссиэйтэн саҕалаан баран, АГАТУга зоотехник идэтигэр үөрэнэн, 2016 с. бүтэрбит. ХИФУга киирэн, эбии үөрэнэн, “ДОУ иитээччитэ уонна тэрийээччи методист” идэлэммит. Сунтаар киин балыыһатыгар үлэлиир. Иллэҥ кэмигэр бэрт минньигэс туортары астыырынан биллэр.
Афанасий Афанасьевич кэргэннээх, 4 оҕо амарах аҕата. Тыа хаһаайыстыбатын техникумун бүтэрэн, землеустроитель-техник идэни баһылаабыт. Билигин СПТЛИгэ охранниктыыр. Тарбаҕар талааннаах уус, туостан сахалыы иһиттэри бэлэмниир, олорор дьиэ акылаатын уларытар биригээдэни түмэн үлэлэтэр.
Надежда Афанасьевна Неустроева, кэргэннээх, икки оҕолоох. ЯЭПИТ АТ и СО буҕаалтыр учуота уонна аудит диэнигэр үөрэммит. ХИФУга кылааһы үрдэтинэр кууруска үөрэммит. АГИК БИД 2016 сыллаахха бүтэрэн, үрдүк үөрэхтэммит. Бастакы категориялаах бибилэтиэкэр.
Петровтар муннуларын бүөтэ, кырачааннара Вера Афанасьевна Леонтьева кэргэннээх, икки оҕолоох, үрдүк үөрэхтээх, ЯЭПИ АТ и СО “Үп-харчы уонна кирэдьиит” идэтин 2019 сыллаахха бүтэрбит. Билигин “Вертера” хампаанньа консультана, дьиэтээҕи кондитер.
Эдьиийдии-балыстыылар сылдьыбыт, дьарыктаммыт куурустарын, ылбыт наҕараадаларын барытын кэчигирэттэххэ, омуннуу түһэн эттэххэ, орто тэтэрээт баҕас чуолкай туолар. Онон быһыта-оһута киллэрэн, билиһиннэрдэххэ, итинник.
Ытыктабыллаах кыһыл көмүс сыбаайбалаахтары бэлиэ түгэннэринэн, итии-истиҥ эҕэрдэ! Уһун дьоллоох олоҕу, чэгиэн-чэбдик доруобуйаны!
Татьяна Захарова-Лоһуура.
