Киир

Киир

Быйыл М.Е. Николаев аатынан Национальнай мэдиссиинэ киинин оҕо онкологиятын отделениета аһыллыбыта 25 сылын бэлиэтиир. Онон сибээстээн, тэрилтэ уруккуттан өйөбүл буолар «Праздник жизни» аһымал пуонданы кытта атырдьах ыйын 12 күнүгэр «Кыайыылаахтар бэстибээллэрэ» диэн өрөспүүбүлүкэтээҕи оҕо успуордун аһымал бэстибээлин тэрийэн ыытаары сылдьар. Бэстибээл онкологияттан эмтэнэ сылдьар оҕолору уонна кинилэр төрөппүттэрин түмэр, чэбдигирдэр, социальнай-психологическай өттүнэн көмө буолар соруктаах.

Бүгүн, Оҕо көмүскэлин күнүгэр, бэстибээлгэ аналлаах пресс-кэмпириэнсийэ буолла. Тэрээһини суруналыыс, аһымал пуонда волонтера Катерина Григорьева иилээн-саҕалаан ыытта. Ыҥырыылаах ыалдьыттарынан СӨ Доруобуйа харыстабылын миниистирин бастакы солбуйааччыта Дмитрий Сергин, Национальнай мэдиссиинэ киинин педиатриятын дириэктэрин солбуйааччыта Евгений Яковлев, «Ил Түмэн» бэчээт дьиэтин генеральнай дириэктэрэ, бар дьон дьокутаата Мария Христофорова, кииҥҥэ эмтэммит оҕолор уонна кинилэр төрөппүттэрэ буоллулар.

Тэрээһиҥҥэ Национальнай мэдиссиинэ киинин оҕо онкологиятын отделениетын сэбиэдиссэйин эбээһинэһин толорооччу Саргылаана Кондратьева оҕо онкологиятын салаата быйылгы үбүлүөйдээх сылы кэккэ ситиһиилэрдээх көрсөрүн бэлиэтээтэ:

“Биһиги оҕолору кутталлаах ыарыылартан көмүскүүр соруктаахпыт. Ол туһугар өрүү билиибитин хаҥата, таһыммытын үрдэтэ турарга дьулуһабыт, федеральнай киини кытта ыкса үлэлэһэбит, аан дойдутааҕы ирдэбиллэри үөрэтэбит. Онкология ыарыыларын барытын 100% кыайабыт диэбэппит эрээри, кэнники ситиһиилэрбититтэн олус үөрэбит. Холобура, урут искэҥ ыарыылаах оҕо тыыннаах хаалыыта 30% эрэ буоллаҕына, аны мэйии, тоноҕос искэниттэн эмтэнии – 64%,  эккэ тахсар искэнтэн – 81%, бүөр искэниттэн – 100%, хаан искэниттэн – 89% тиийдэ”, - диэн кини үллэһиннэ. Маны таһынан, Саргылаана Афанасьевна онкологиянан ыалдьыбыт оҕолор станционарга олус уһуннук сыталларын, онон кинилэргэ усулуобуйаны тэрийиигэ улахан өҥөлөөх «Праздник жизни» аһымал пуондаҕа уонна бары успуонсардарга махтанна.

Оҕо онкологиятын отделениетыгар, оҕолорго уонна төрөппүттэргэ өр сылларга көмө буолар «Праздник жизни» пуонданы төрүттээччи, Ил Түмэн Дьиэ кэргэн уонна оҕо саас бастайааннай кэмитиэтин бэрэссэдээтэлэ, дьокутаат Алена Атласова оҕолору адьас кыра эрдэхтэриттэн билэрин уонна үгүстэрэ ыарыыттан босхолонон, улаатан, сириэдийэн, ыал ийэлэрэ-аҕалара буолан эрэллэриттэн олус үөрэрин билиннэ. Кини мэдиссиинэ киинигэр окнологияттан эмтэнэ сытар оҕолорго анаан «Күннээх куорат» оҕо саас уораҕайын, балыыһа храмын туппуттарын, сайыҥҥы лааҕырдары хайдах тэрийбиттэрин кэпсээтэ. Кини сайын ыытыллыахтаах «Кыайыылаахтар бэстибээллэрэ» күрэхтэһии урут Москуба куоракка ыытыллар Арассыыйатааҕы «Кыайыылаахтар оонньууларын» холобурунан тэриллэрин эттэ:

«Ыалдьыбыт оҕоҕо эмтэн ураты туохтааҕар да кыһамньы уонна болҕомто ирдэнэр. Биһиги көмөбүт барыта онно туһуланар. Ол иһин биһиги оҕолорбутун Арассыыйатааҕы «Кыайыылаахтар оонньууларыгар»  биэс сылы быһа кытыннарбыппыт. Сахабыт сирин араас муннуктарыттан барыта 60 оҕо кыттыбыта. Оҕолорбут өрүү ситиһиилээх, мэтээллээх кэлэллэрэ. Хомойуох иһин, бу тэрээһин бүтэһигин 2019 сылтан ыытыллыбат. Онон, биһиги ол оннутугар бэйэбит «Кыайыылаахтар бэстибээллэрин» тэрийэргэ быһаардыбыт.   

Национальнай мэдиссиинэ киинин психолога Айталина Платонова, оҕолор олус талааннаахтарын бэлиэтээн туран, бэстибээлгэ успуорт көрүҥнэрин таһынан айар дьоҕур күрэҕин тэрийэргэ быһаарбыттарын сырдатта. Күрэх аҕыс көрүҥҥэ ыытыллар: вокал (ырыаны толоруу), хореография (үҥкүүнү толоруу), хоһоону уонна прозаны дорҕоонноохтук ааҕыы, ойуулуур-дьүһүннүүр ускуустуба, декоративнай-прикладной ускуустуба, хаартыска, компьютернай коллаж, видеоролик. Сайаапкалары бэс ыйын 1 күнүттэн от ыйын 1 күнүгэр диэри Этот адрес электронной почты защищён от спам-ботов. У вас должен быть включен JavaScript для просмотра. аадырыска ылаллар.

Өрөспүүбүлүкэтээҕи путбуол успуорт оскуолатын дириэктэрэ Николай Цыпандин Николай Цыпандин иһитиннэрбитинэн, успуорт аһымал бэстибээлигэр оҕолор, саастарынан үс бөлөххө арахсан, успуорт алта көрүҥүгэр: булдьалаах ытыыга, чэпчэки атлетикаҕа (60 м сүүрүүгэ), дуобакка, саахымакка, остуол тенниһигэр, саха төрүт остуол оонньууларыгар (хабылыкка, хаамыскаҕа)    күрэхтэһиэхтэрэ. Бэстибээл «Дохсун» успуорт комплекска ыытыллыаҕа.

Ил Түмэн дьокутаата Мария Христофорова «Праздник жизни» аһымал пуонданы төрүттээччи Алена Атласова, өссө дьокутаат буола илигинэ, бу олус уустук хайысханы ылсан күн бүгүнүгэр диэри ыһыктыбакка илдьэ сылдьарын эттэ уонна махтанна. Кини тэрээһиҥҥэ элбэх оҕо кыттарыгар баҕарда уонна көмөлөһүөм диэн эрэннэрдэ.  

Тэрээһин оҕолорун эмтэппит төрөппүттэр эҕэрдэлэринэн, «Камелек» маҕаһыынтан оҕолорго бэлэхтэри туттарыынан, хаартыскаҕа түһүүнэн түмүктэннэ. Манна аһымал пуонда көмөлөһөн эмтэппит, улаатыннарбыт оҕото Илахе Гамбарова олус истиҥ ырыаны ыллаан Оҕо көмүскэлин күнүгэр үчүгэйкээн бэлэх оҥорбутун бэлиэтиир тоҕоостоох.

WhatsApp Image 2023 06 01 at 15.09.50

«Кыайыылаахтар бэстибээллэрэ» диэн өрөспүүбүлүкэтээҕи оҕо успуордун аһымал бэстибээлин сүрүн партнерунан СӨ физическэй култуураҕа уонна успуорка министиэристибэтэ, манна киирэр Өрөспүүбүлүкэтээҕи путбуол успуорт оскуолата, Өрөспүүбүлүкэтээҕи успуорт эрэллэрин бэлэмниир киин, Өрөспүүбүлүкэтээҕи адаптивнай физкультура уонна успуорт киинэ буолаллар.

Бэйэ кэр.

Санааҕын суруй

Бүтэһик сонуннар