Мииринэйтэн баара-суоҕа уонча көстөөх сиргэ, "Сила Сибири” модун барыл чэрчитинэн, үлэ бөҕөтө бара турар. Саха сирин Чайыҥдатыгар хостонор, гелийтан ыраастана илик гааспыт саппааһа сөҕүмэр элбэх. Үлэ буолунай. Гаас, “ИСТА” үс тыһыынча усталаах утумунан, Кытай Хэйлунцзян провинциятыгар суккуллар. Бу соторутааҥҥа диэри, Мииринэй куоратыттан, “газпромнарга” үлэлиир киһи аҕыйах этэ. Ол уларыйда. Чугаһа да бэрт.
Билигин оробуочай идэлээх олохтоох дьон, “Газпром” хампаанньаҕа киирэригэр кыах баар буолан эрэр. Үгүс, күүстэрин-күдэхтэрин үгэнигэр сылдьар дьон, түптээн үлэ булбакка сылдьаллара Саха сиригэр ханна барытыгар баар көстүү. Дьокуускайга дуу Хаҥаласка дуу, эбэтэр Чурапчыга, Бүлүүгэ үлэтэ суох эрэйин билбит ыччаттар элбэхтэр. Кинилэр манна, Саха сирин арҕаа эҥэригэр, бэйэлэрин тургутунан көрдөхтөрүнэ баа буолбат ини.
Ленскэй оройуонугар, Чайыҥдатааҕы ниэп-гаас хостуур сиргэ, «Сила Сибири» судаарыстыбаннай хабааннаах барыл толоруллар сиригэр үлэ кэскилэ баар. Аҥаардас Чайыҥдаҕа биэс линейнэй производственнай учаастак үлэлиир. “Газпромстройга" автокыраан машинистара, монтажниктар, элиэктриктэр, суоппардар, гааска сыhыаннаах силиэсэрдэр, сыбаарсыктар, буровиктар, аварийнай үлэлэргэ дефектоскопистар ирдэнэллэр.
Хайдах онно тиийэбит диэххит.
Баһаалыста, Дьокуускайтан Мииринэйгэ, Ленскэйгэ диэри таксыы күн ахсын сылдьар. Көмүөл,муус тоҥор кэмиттэн ураты кэмнэргэ
Мииринэйтэн Ленскэйгэ диэри сылдьар эриэйсэбэй оптуобус суох.
Таксыыстар үлэлииллэр. Мииринэйтэн Ленскэйгэ да Чайыҥдаҕа да тириэрдэллэр. “Индрайвер” да баар.
Үлэлиэн баҕалаахтан туох ирдэнэр?
Ирдэбиллэрэ – эн ниэп-гаас салаатыгар, үрдүк эбэтэр орто аналлаах үөрэхтээх, үс-биэс сылтан итэҕэһэ суох ыстаастаах буолуохтааххын.
Кыһыл-Сыырга - ЯТЭКка, Дьокуускайга гааһы убатар собуокка, уопсайынан углеводородтаах сырьены, уматыгы тула уонна нефтебазаларга, АЗСтарга үлэлээбит дьон, үлэҕэ киирэллэригэр судургу.
Араас эрэгэйиэннэртэн, гааска сыһыаннаах да сыһыана суох дьон, биһиги диэки үлэлии кэлэллэрэ өссө элбээри турар.
Новосибирскай, Кемерово, Томскай, Красноярскай, Иркутскай уобалас, Бүрээтийэ, Киргизия дьоно толорулар. Аны билигин, Донбасс дьоно кэлитэлиэхтэрэ.
Онон, үлэ миэстэлэринэн тутахсыйбыт саха улуустарын, Дьокуускай куорат олохтоохторо маны болҕойуҥ.
«Газпром”, Ленскэй оройуонугар, «Сила Сибири» учаастактарыгар үлэлиир тэрилтэлэрин сыныйан үөрэтиҥ, түлүппүөнүнэн, электроннай буостанан, ватсаабынан, вайберынан, инстаграмынан сибээстэһиҥ.
Интернет ситимин хасыһыҥ.
Хамнастарын, бириэмийэлэрин, баахта болдьоҕун, айан төлөбүрүн тоһоҕолоон ыйыталаһыҥ.
Өссө төгүл төхтүрүйэн этэбин - биир ыйга сүүс тыһыынчаны хамнастанар, нөҥүө ыйыгар туох да төлөбүрэ суох сынньанар буоллаххытына(“Межвахтовый период”) хамнаскыт кыччаан, сүүйтэрэн тахсаҕыт.
Доҕоттор,"Газпром" куруук үлэһиттэри ыҥырбат. Соҕурууттан дьон ааллаан кэлэн үтүө миэстэлэри бобо харбаталаатахтарына, эмиэ "кураанаҕы кууһуоххут".
Мин аҥаардас "Газпромҥа" эрэ кэлэн үлэлээн көрүҥ диэбэппин. Мииринэйгэ "РНГ" уонна "Таас-Юряхнефтегаздобыча" диэн бөдөҥ нефть хостуур хампаанньалар бааллар. Баахтабай бөһүөлэктэрэ адьас куораттыы тииптээхтэр.
"РНГ" хонтуората Мииринэй куоратыгар Тихонов уулуссатыгар баар.
Олору эмиэ булгуччу ыйыталаһыҥ.
Нефть-гаас хостуур идэтигэр куорачыката,уопсайынан тиэхиникэҕэ сыһыана суох буоллаххытына, повар, разнорабочай идэлэрэ бааллар. Чэйиҥ, хамсаныҥ!
Станислав Алексеев. Мииринэй куората.
