Сыбаайа үлэлэрэ саҕаланааттарын кытары тутуу саҕаланыытын хаартыскаҕа түһэрдим. Бу диэн эттэххэ, манна ыллыҥ да ханнык баҕарар улахан да, кыра да промышленнай эбийиэги, бэл, олорор дьиэни тутууну хаартыскаҕа түһэрэргин төрүт сөбүлээбэттэр.
Бобуу-хаайыы олус элбэх. Уопсайынан, суруналыыс быһыытынан Мииринэйгэ үгүс үүрүүнү, үтүрүйүүнү көрсөн “тириим халыҥаан турар”.
Холобур, бу тутуллуохтаах дьиэҕэ туох алдьархайдаах кистэлэҥнээхтэрэ эбитэ буолла?! Тутууга сыһыаннаах биэдэмистибэлэр үлэһиттэрэ, былаастар бэрэстэбиитэллэрэ бу эбийиэк туһунан кэпсэтиэхтэрин да баҕарбатылар.
Мунньахха олоробут, солото суохпут, ол киһиттэн ыйыт, онтон сурас диэн куотуналлар.
Өтө көстөр: ким да информация иһин эппиэтинэһи ылыан баҕарбата, куттанара. Ону мин дьаныардаахтык күүтэр, көҥүллээһин көрдүүр, кэбиниэттэри кэрийэр, ааттаһар идэм суох. Кэллим да хаартыскаҕа түһэрдим. Онно туһааннаах профессиональнай идэлээхпин, сокуонунан көҥүллээхпин. Оттон хыраам искибиэрин аттыгар эбийиэги тутуу туһунан информация, иһитиннэрии сэдэх буолбутун да иһин, билбитим ыраатта.
Манна элбэх кыбартыыралаах дьиэ тутуллуохтаах. Хомойуох иһин, бу кэнники уонча сылга бэрт үгүс дьиэ «бытыктаах» тутууга кубулуйбута.
Биир «сибиэчикэ» болдьохтоох кэмиттэн хас да сыл хойутаан тутуллар, бэдэрээччиктэр субу-субу уларыйаллар. Ол туһунан суруйдахпына былаастар букатын сөбүлээбэттэр. Кинилэр өттүлэриттэн суруналыыс үлэтин хааччахтыыр 144-с РФ холуобунай ыстатыйата, кэрэспэндьиэни араҥаччылыыр РФ «212№-дээх сокуонун 47-с ыстатыйата баалларын да билиммэттэр».
Ол, дьиэни тутуу Мииринэйгэ сүрдээх эрэдээктээхтик барарыттан, элбэх сыысхал, кэһии баарыттан сэдиптэнэрэ эндэппэккэ биллэр.
Станислав Алексеев. Мииринэй куората. Ааптар хаартыската.
