Пионер лааҕырдара СССР кэмигэр сүрдээҕин сайдан испиттэрэ.
Сол курдук, 60-с сыллар саҥаларыгар, «Якуталмаз» трест салалтатын быһаарыныытынан, алмаасчытар оҕолоругар аналлаах пионер лааҕыра тэриллибитэ.
2022 сыл - «Орленок» лааҕыр төрүттэммитэ 60-с сыла.
2002 сыллаахха, «АЛРОСА” салалтатын, оччотооҕу бастакы вице-бэрисидьиэнэ А.Морозкин, кылаабынай инженер А.Мельник, КСК дириэктэрэ Г. Юст, «Профалмаз» профсойуус бэрэссэдээтэлэ П.Третьяков кыттыылаах үбүлүөйдээх бырааһынньык буолбута. Мин онно “Мирнинский рабочий” хаһыат аатыттан сылдьыбытым .
«Орленок» Оҕо сынньанар лааҕыра хааччыллыытынан Илин Сибииргэ сиригэр тэҥнээҕэ суох. Айылҕата – талыы-талба. Бу - Оччугуй Ботуобуйа үрэх хаҥас кытыла. Сөтүөлүүргэ туох да ааттаах сир. Тула – тайҕа, үрүйэлэр, дьүөдьэлэр.
“Орленок” Арыылаах сэлиэнньэтиттэн арҕаа диэки баар. Хампаанньаҕа араас уларыйыылар күөннэригэр, «Орленок» лааҕыр сабыллан хаалбата. Төттөрүтүн сайдар, чэчириир. «Орленок» оҕолору чэбдигирдэр Киин, 7-тэн 14-гэр диэри саастаах оҕолору, сылын ахсын сынньатар. Лааҕыр, ордук чуолаан, Нина Паукова дириэктэрдиир кэмигэр сайдыбыта. Павильоннар, бассыайын, оонньуур сир баар буолбуттара. Уопсайынан да, дьоллоох оҕо сааһы өрөгөйдүүр көрдөөх-нардаах лааҕырга сынньанар үчүгэй да буоллаҕа.
Алмаастаах хампаанньа КСК-та, үгэс курдук, Новосибирскай куораттан устудьуоннары баспытааталларынан ыҥырталыыр идэлээх. Онно эбии Мииринэйтэн аниматордар, уһуйааччылар оҕолору кытары дьарыктаналлар.
Оччугуй Ботуобуйа сылаас уутугар сөтүөлээн, араас оонньуур аттракционнарга көрүлээн, успуордунан дьарыктанан, оҕолор сайыны умнуллубаттык атаараллар. Аһылыктара – «АЛРОСА» санаторийдарыгар курдук – тотоойу, иҥэмтиэлээх, элбэх эттээх, балыктаах, фрукталаах, оҕуруот астаах. Оҕо чэбдигирдэр Киинэ, бэс ыйыттан атырдьах ыйын бүтэһигэр диэри үлэлээччи.
2021 сыллаахха, эбиитин, английскай тылы сыныйан үөрэтэр, лингвистическэй “Little eagle”(Өрүөлчээн)» симиэнэ баара. Алмаастаах хампаанньа үлэhиттэрэ, оҕолорун сүүрбэ биир күн «Орленокка» сынньаталларыгар, баара-суоҕа, 10 тыһыынча солк. төлүүллэр. Оттон атын тэрилтэлэр дьонноругар төлөбүр добуочча – 34 тыһыынча солк. Дьэ хайдаҕый?!
