Хас эмэ сыл устатын тухары Мииринэйдээҕи үөрэтэр-курсовой кэмбинээт (УКК) идэтийиилэрин таһымын улаатыннарар уонна саҥа үлэлии кэлбит дьону бу, Московскай уулуссаҕа баар икки этээстээх мас дьиэҕэ дьарыктыыра. Элбэх киһи бу манна хайа промышленноһын, энэргиэтикэ, тутуу, тырааныспар уонна ДЬХХ салааларыгар үөрэнэн үрдүк хамнастаах идэни ылбыта.
Үгүс саха ыччата бу тэрилтэ нөҥүө, «АЛРОСА» хайаны-байытар кэмбинээттэригэр, самалык тэрилтэлэргэ үлэлии барбыта. 70-с сылларга тутуллубут мас дьиэ олус эргэрэн, салгыы манна дьону үөрэтэргэ төрүт эппиэттээбэт. Ону учуоттаан, УКК «МИР» рудник АБК-гар, ол эбэтэр Кузаков шоссетыгар көстө. Онно Мииринэй куораттан №1-дээх оптуобус сылдьар. АБК – “административно-бытовой комплекс” диэн. Мииринэй-Ньурба хайаны байытар кэмбинээтин (МНГОК) “МИР” руднигын АБК-та. Манна, УКК үлэлииригэр туох баар усулуобуйа барыта баар. Киэҥ-куоҥ аактабай саала, кэбиниэттэр, лабораторнай дьарыктаныыга аналлаах хостор. Ордук шахта дьыалатыгар идэтийиини ылааччыларга тоҕоостоох.
Аны туран, билигин хамсыктан сылтаан, дьону дьарыктыырга кэккэ күчүмэҕэйдэр үөскээтилэр. Онон, УКК аныгы кэмҥэ тоҕоостоох, саҥа кыраапыгынан үлэлиир.
УКК мантан көстө
Станислав Алексеев. Мииринэй куората.
