Урут “Газпром” хампаанньа үлэ миэстэтин таһаарбат, төрүт олохтоохторго бакаансыйаалары тосхоппот, чэҥкир соҕурууттан баахтаны эрэ тиэйиинэн муҥурданарынан биллэрэ. “Газпром” үс самалык хампаанньаларын үлэһиттэрин соҕуруу дойдуларыгар бараары, Мииринэй аэробаксаалыгар сылдьалларын олохтоохтор куруук көрөллөр.
Бу – саамай улахан баахта. “Сила Сибири” модун бырайыагы олоххо киллэрээччилэр. Кинилэр хостуур гаастара сотору кэминэн “ИСТА” турбатынан Кытайга бараары бэлэмнэнэр. Бу соторутааҥҥа диэри Мииринэй куоратыттан “газпромнарга” үлэлиир киһи суоҕун кэриэтэ этэ. Мииринэйдээҕи Дьарыктаах буолуу киинэ, урут мииринэйдэр кыайбакка олорбут сытыы боппуруостарын сорунуулаах үлэнэн быһаарда.
Үлэ чааһыгар билигин оробуочай идэлээх олохтоох киһи, “ГазпромтраснгазТомск” хампаанньаҕа киирэригэр кыах баар буолан эрэр. Үгүс күүстэрин-күдэхтэрин үгэнигэр сылдьар дьон, түптээн үлэ булбакка сылдьаллар. Мииринэй куоратын иһигэр билигин хантан эппиэттиир хамнастаах үлэ көстүөй? Дьарыктаах буолуу киинэ “ГазпромтрансгазТомск” саламтатын уонна Ленскэй куоракка баар офиһын менеджемнин кытары утумнаахтык үлэлээбитин түмүгэр сөбүлэҥ баар буолла. Ленскэй оройуонугар Чайыҥдатааҕы ньиэп-гаас хостуур сиргэ, “Сила Сибири” судаарыстыбаннай хабааннаах барыл толоруллар сиригэр үлэ баар. Аҥаардас Чайыҥдаҕа биэс линейнэй производственнай учаастак үлэлиир. “ГазпромтрансгазТомск” хампаанньаҕа автокыраан машинистара, монтажниктар, элиэктриктэр, суоппардар, гааска сыhыаннаах силиэсэрдэр, сыбаарсыктар, буровиктар, аварийнай үлэлэргэ дефектоскопистар ирдэнэллэрин туһунан, Мииринэйдээҕи Yлэ киинин дьиэтигэр электроннай фронтон биллэрэ турар.
Уопсайынан, мииринэйдэр эрэ буолбакка, Бүлүү улуустарын олохтоохторо, муус турдаҕына арҕаа сирдэргэ кэлэн, бэйэлэрин тургутан көрүөхтэрин сөп. Оттон “ГазпромтрансгазТомск” хонтуората Ленскэй куоратыгар баар. Мииринэйтэн Ленскэйгэ диэри эриэйсэбэй оптуобус суох. Таксыыстар 2 тыһ солк Мииринэйтэн Ленскэйгэ тиэрдэллэр. “Индрайвер” эмиэ баар. Бары бу иһитиннэриигэ болҕомтоҕутун уураргыт оруннаах. 2018 сыл сэтинньи ый бастакы декадатын туругунан, Мииринэй куоратыгар үлэ “баанын” испииһэгэр “ГазпромтрансгазТомск” бакаансыйата бэл “Роснефть” тэрилтэлэрин баһыйда. Ирдэбиллэрэ кытаанах, ол курдук, ньиэп-гаас салаатыгар үрдүк эбэтэр орто анал үөрэхтээх, биэс сылтан итэҕэһэ суох ыстаастаах буолуохтааххын.
Кыһыл-Сыырга – ЯТЭК-ка, Дьокуускайга гааһы убатар собуокка, уопсайынан, углеводородтаах сырьены, уматыгы тула үлэлээбит дьон “ГазпромтрансгазТомскайга” бэйэлэрин холонон көрүөхтэрин сөп. Ол курдук, нефтебазаларга, АЗС-га үлэлээбит дьон эмиэ үлэ миэстэлэрин ыйытыалаһыахтарын сөп. Саха дьоно бэйэлээх бэйэбит сирбитигэр, сайдан-сириэдийэн ырааппыт баай ньиэп-гаас салаатын сэргээбэттэрэ хомолтолоох. Араас эрэгэйиэннэртэн гааска сыһыаннаах да, сыһыана суох да дьон, Саха сирин арҕаа өттүгэр кэлэн үлэлииллэрэ үксээн иһэр. Урут Новосибирскай, Кемерово дьоно элбэх буоллахтарына, билигин Иркутскай уобалас, Бурятия, Киргизия дьоно толорулар. Онон, Бүлүү улуустарыгар үлэтэ суох хаалбыттар, хамнастаах үлэ миэстэлэринэн тутахсыйбыт Дьокуускай куорат олохтоохторо маны болҕомтоҕо ылыҥ. “Газпром” Ленскэй оройуонугар “Сила Сибири” учаастактарыгар үлэлиир тэрилтэлэрин сыныйан үөрэтиҥ, төлөппүөнүнэн, электроннай буостанан, бассаабынан сибээстэһиҥ. Хамнастарын, бириэмийэлэрин, баахта болдьоҕун, айан төлөбүрүн ыйыталаһыҥ. Өссө төгүл төхтүрүйэн этэбин, биир ыйга 100 тыһ солк төлүүр, нөҥүө ыйыгар туох да төлөбүрэ суох сынньанар буоллаххытына, (“Межвахтовый период”) хамнаскыт кыччаан, сүүйтэрэн тахсаҕыт. Онон, бу олус эппиэттээх, олоххо наадалаах дьыаланы болҕойуҥ.
Станислав Алексеев, Мииринэй куората.
