Кэбээйи улууһугар Дьокуускайдааҕы мэдиссиинэ кэллиэһин салаатын үөрүүлээх аһыллыыта буолан ааста. Манна 23 бастакы куурус устудьуона кыттыыны ылла.
Устудьуоннар 2 сыл 10 ый “Сестринское дело” диэн идэҕэ Кэбээйитээҕи балыыһа уонна 1 №-дээх Сангардааҕы орто оскуола базатыгар үөрэниэхтэрэ. Бүтэһик кууруска эбии үөрэнэн массажист, косметолог, эмтиир физкультура сиэстэрэтэ сэртипикээттэрин ылыахтарын сөп. Устудьуоннар үөрэхтэрэ Кэбээйи улууһун бүддьүөтүттэн төлөнөр.
Саҥа салаа устудьуоннарын кэллиэс дириэктэрэ Дмитрий Алексеев эҕэрдэлээтэ. Кэбээйитээҕи киин балыыһа сүрүн бырааһа
Иван Оконешников, кэллиэс үрдүк квалификациялаах уһуйааччылардааҕын бэлиэтээтэ. Устудьуоннары үлэлии сылдьар быраастар уонна улахан уопуттаах учууталлар үөрэтиэхтэрэ.
Дьокуускайдааҕы мэдиссиинэ кэллиэһэ биир саамай кырдьаҕас үөрэх кыһата буолар. 1906 сыллаахха Дьокуускайдааҕы эр дьон фельдшерскэй оскуолатыттан устуоруйата саҕаламмыт. Кэллиэс Мииринэйгэ, Ленскэйгэ, Ньурбаҕа, Хаандыгаҕа, Удачнайга филиаллардаах. Манна уопсайа 1500 тахса оҕо үөрэнэр.
