Үөһээ Бүлүүттэн төрүттээх Васильевтар-Мойтохоновтар дьиэ кэргэн “Семья года” диэн бүтүн Арассыыйатааҕы куоҥкуруска “Үгэһи илдьэ сылдьааччы – дьиэ кэргэн” номинацияҕа кыайыыны ситистилэр. Ону таһынан, Саха сириттэн кыттыбыт хас да ыал “Семья года. Россия 2019” диэн бочуоттаах кинигэҕэ киириэхтэрэ.
“Семья года” куоҥкурус быйыл төрдүс төгүлүн ыытылынна. Биэс номинациялаах: “Элбэх оҕолоох ыал”, “Эдэр ыал”, “Тыа ыала”, “Үгэһи илдьэ сылдьааччы – дьиэ кэргэн”, “Кыһыл көмүс дьиэ кэргэн”.
“Мин дьиэ кэргэним – мин дойдум” диэн девиһинэн ыытыллыбыт куоҥкуруска дойду 85 субъегыттан тыһыынчанан дьиэ кэргэн кытынна. Үөһээ Бүлүүттэн сылдьар Васильевтар-Мойтохоновтар дьиэ кэргэн “Үгэһи илдьэ сылдьааччы – дьиэ кэргэн” номинация кыайыылааҕынан буоллулар. Ону таһынан, Саха сириттэн кыттыбыт ыаллар: Үөһээ Бүлүүттэн Слепцовтар, Эбээн-Бытантайтан Константиновтар, Горнайтан Максимовтар уонна Дьокуускайтан Петровтар “Семья года. Россия 2019” диэн бочуоттаах кинигэҕэ киириэхтэрэ.
Кыайыылаахтары наҕараадалааһын алтынньы 30 күнүгэр Москубаҕа Кремль дыбарыаһыгар буолар. Бу күн үгэс курдук экскурсия уонна билсиһии бырааһынньыга күүтэр.
