Киир

Киир

Кулун тутар 28 күнүгэр улахан судаарыстыбаннай, научнай уонна уопсастыбаннай диэйэтэл, Наука уонна тиэхиньикэ эйгэтигэр СӨ судаарыстыбаннай бириэмийэтин лауреата, Арассыыйа уонна Өрөспүүбүлүкэ агропромышленнай комплексын бочуоттаах үлэһитэ, СӨ норуот хаһаайыстыбатын үтүөлээх үлэһитэ, тыа хаһаайыстыбатын наукатын дуоктара, Аграрнай үөрэхтээһин аан дойдутааҕы академиятын чилиэнэ, Арассыыйа естественнай наукаларын академиятын академига Айаал Иванович Степанов туһунан икки туомнаах өйдөбүнньүк кинигэ биһирэмэ буолла.  

6Q5A6765

Биһирэмҥэ СӨ бырабыыталыстыбатын бэрэссэдээтэлин солбуйааччы Михаил Никифоров кытынна. Кини Айаал Иванович төрөппүттэригэр төрөөбүт дойдутугар элбэх үтүөнү оҥорбут чулуу саха уолун иитэн таһаарбыттарын иһин ис сүрэҕиттэн махтанна. Ону сэргэ: «Айаал Иванович кылгас эрээри, чаҕылхай олоҕу олорбута. Өрөспүүбүлүкэ тыатын хаһаайыстыбатын уонна аграрнай наукатын сайдыытыгар сүҥкэн кылааттаах. Биһиги үлэбитинэн элбэхтик алтыһар этибит. Кини судургу, көнө майгылаах, мындыр уонна талааннаах салайааччы, улахан учуонай этэ. Бу олус кэрэхсэбиллээх өйдөбүнньүк кинигэ күн сиригэр тахсарыгар үлэлэспит дьоҥҥо махтанабын», - диэн эттэ.    

Кинигэ бастакы «Айаал Иванович Степанов. Воспоминания» диэн туомугар дьиэ кэргэнин, чугас дьонун, бииргэ үөрэммит, үлэлээбит дьонун, доҕотторун ахтыылара киирдилэр. Кинигэ «Айаал Иванович Степанов. Доклады, выступления, публикации» диэн ааттаах иккис туомугар араас таһымнаах улахан мунньахтарга, тэрээһиннэргэ Агропромышленнай комплекс сайдыытыгар, айылҕа харыстабылыгар, аграрнай наукаҕа сыһыаннаах уонна да атын өрөспүүбүлүкэ олоҕор суолталаах суруйуулара, дакылааттара киирдилэр. Маны таһынан бу туомҥа иһитиннэрэр-сырдатар эйгэлэргэ тахсыбыт ыстатыйалар библиографиялара киирдэ. 

Кинигэ биһирэмигэр сүрүн дакылааты СӨ тыатын хаһаайыстыбатын миниистирэ Александр Атласов иһитиннэрдэ. Кини  Айаал Степанов миниистиринэн үлэлиир кэмигэр 2002-2006 сылларга Бэрэсидьиэн тыа сирин социальнай-экономическай сайдыытын программатын олоххо киллэриигэ элбэх сыратын ыыппытын кэпсээтэ. Чопчу Айаал Иванович этиитинэн өрөспүүбүлүкэ тус сыаллаах (целевой) бары бырагыраамаларыгар тыа сирин сайдыытыгар туспа үбү-харчыны көрбүттэрэ. Онон кини үтүөтүнэн өрөспүүбүлүкэ хас биирдии оҥорон таһаарар тэрилтэтэ өйөбүл ылар кыахтаммыта.  Айаал Степанов салайыытынан тыа хаһаайыстыбатын култуураларын сиэмэнэн үүннэрии, сылгы иитиитигэр удьуор сылгыны ууһатыы хайысхалара тупсарыллыбыттара, төрүт саха ынаҕын сөргүтэр питомник тэриллибитэ, саҥа вакциналар, пробиотикта уонна дьиэ кыылын эмтэрэ айыллыбыттара,   

Айаал Степанов кылгас олоҕун устатыгар СӨ бэрэсидьиэнин уонна бырабыыталыстыбатын дьаһалтатын салайааччытын солбуйааччынан, Дьокуускайдааҕы тыа хаһаайыстыбатын научнай-чинчийэр институтун дириэктэринэн, тыа хаһаайыстыбатын миниистиринэн, СӨ бырабыыталыстыбатын бэрэссэдээтэлин солбуйааччынан таһаарыылаахтык үлэлээбитэ. Дьокуускайдааҕы тыа хаһаайыстыбатын научнай-чинчийэр институтун дириэктэринэн үлэлии сылдьан соһумардык олохтон туораабыта. 

Хаартыска: Андрей Сорокин (ЯСИА)

Тарҕат:

Санааҕын суруй

Бүтэһик сонуннар