Киир

Киир

Үс сыллааҕыта Иннокентий Иванов «Чуумпу Бүлүү: алмаас уонна харах уута» диэн бөдөҥ айымньыта «Ситим» медиа бөлөххө оҥоһуллан тахсыбыта. Ону ааҕааччы олус сэргии, чахчы сэҥээрэ ылыммыта.

ИДьМ астаапкаҕа полковнига, айар-суруйар эйгэҕэ ити курдук соһуччу киирэн, билигин – СӨ суруйааччыларын сойууһун чилиэнэ. Дьиҥэр, кини бу «соһуппут айымньыта» олох чахчыта буоларын туһугар сүүрбэ биэс-хас сыл устатыгар утумнаахтык, дьүккүөрдүк үлэлээбит.

Эмиэ биир уратыта, кэрэхсэбиллээҕэ диэн, бу улахан, бэрт дьоһуннаах кинигэ дьон-сэргэ өйөбүлэ баар буолан тахсыбыта. Ол курдук, суруйааччы кинигэ иннигэр ааттаан махтаммыт дьонун кэккэтигэр, оччотооҕуга Дьокуускай куорат баһылыга, билигин СӨ Ил Дархана Айсен Николаевтан саҕалаан, элбэх киһи ахтыллар.   

Аны туран, кинигэ тахсыан иннинэ айымньыттан быһа тардыылар «Күрүлгэн», «Чолбон», «Байанай» сурунаалларга бэчээттэммиттэрэ. Өрөспүүбүлүкэ сурунааллара итинник болҕойбуттара бу айымньы ис хоһоонун, уус-уран кыаҕын туһунан элбэҕи этэр.

chuumpu

Кинигэ бэчээттэммитин кэннэ арамаан нууччалыы тылбааһын быһа тардыыта «Вилюйские зори» сурунаалга тахсыбыта. Билигин «Полярная звезда» сурунаал бүтүннүү таһаарардыы тэринэн бэчээттээн эрэр. Тылбааһыгар Валентина Комиссарова-Күлүмүрэ уһуннук үлэлээтэ. Кини – айар-суруйар эйгэҕэ эмиэ кэнники кэмҥэ дьулурҕатык киирбит суруйааччы, тылбаасчыт.

Билигин «Чуумпу Бүлүү: алмаас уонна харах уута» арамаан дойдулар икки ардыларынааҕы «Open Eurasia Book Forum & Literary Festival» күрэххэ кытта сылдьар.

Онон ситимнээн, муус устар 28 күнүгэр ити «Аһаҕас Евразия» диэн добун түһүлгэ, күрэх биир тэрийээччитэ Марат Ахмеджанов, Лондонтан холбонон, Иннокентий Иванову кытта аныгы зуум ситим нөҥүө  кэпсэттэ, айымньыта бастыҥнар барыл испииһэктэригэр киирбиттэринэн суруйааччыны эҕэрдэлээтэ.

Марат Ахмеджанов бэйэтэ Узбекистаҥҥа төрөөбүт татаар эбит. Казахстаҥҥа олоро, үлэлии сылдьыбыт. Лондоҥҥа олорбута уон алта сыл буолбут. Кинигэ таһаарыытынан дьарыктанар. Британия «Hertfordshire Press» бэчээт кыһатын тэрийээччитэ уонна «Eurasian Creative Guild» («Евразия айар-суруйар дьонун гильдията») диэн тэрилтэ хоһулук салайааччыта. Саха сиригэр кэлэ сылдьыбыт, ол туһунан бэрт үчүгэй өйдөбүллээх.

Кини урукку сылларга бу добун түһүлгэҕэ Саха сириттэн Наталья Харлампьева уонна Евдокия Иринцеева-Огдо хоһоон-кэпсээн тосхоллоругар кыттыбыттарын, бэлиэтэммиттэрин кэпсээтэ. Бу сырыыга улахан айымньынан Иннокентий Иванов уонна Иван Андросов-Айанньыт кыттыбыттарын эттэ. Онуоха Иннокентий Иванов айымньыта күрэх саайтыгар барбыт куоластааһыҥҥа күүстээх көрдөрүүлээҕин бэлиэтээтэ.

Бу кэпсэтиигэ, суруйааччыга көх-нэм буолан,  кинигэни таһаарбыт «Ситим» медиа бөлөх ол кэмнээҕи салайааччыта, СӨ бар дьонун депутата Мария Христофорова,  ону кытта арамаан эрэдээктэрэ Афанасий Гуринов-Арчылан кытыннылар.

Саха аныгы уран суругун айымньыта аан дойду түһүлгэтигэр маннык болҕомтоҕо киирбитэ бэйэтэ улахан ситиһии буолар.  Ол эрээри, «Чуумпу Бүлүү: алмаас уонна харах уута» арамаан  «Аһаҕас Евразия» күрэх үс талыы чулууларын ортолоругар киирэр кыахтаах диэн эрэнэбит уонна «чахчы, оннук буоллар!» диэн баҕарабыт. Түмүк бэс ыйын бүтүүтүгэр биллиэхтээх.

Билигин бу саха ааҕааччытыгар сөбүлэппит арамаан нууччалыы тылбааһын кинигэ быһыытынан бэчээттээн таһаарыы соруга турар. Нуучча тылын кыаҕын-ыырын туһанан, Саха сирин туһунан атын омук дьонугар уус-уран айымньы көмөтүнэн билиһиннэрэрбит дэлэлээх үчүгэй буолуох этэ дуо?

Бу соругу эһиилгэ диэри олоххо киллэрдэхпитинэ, ол өрөспүүбүлүкэбит сүүс сылыгар олус дьоһуннаах ситиһии буолуоҕа.

Афанасий ГУРИНОВ-АРЧЫЛАН
Тарҕат:

Санааҕын суруй