От ыйын 20 күнүгэр П.И. Дудкин аатынан Дьокуускайдааҕы сибээс уонна энергетика коллеһыгар орто анал үөрэхтээһин үлэһиттэрэ, туттарсар оҕолорго уонна кинилэр төрөппүттэригэр анаан, пресс-кэмпириэнсийэ тэрийэн ыыттылар.
Тэрээһин сэһэргэһии быһыытынан барда. Манна спикердэр «Үөрэхтээһин» национальнай бырайыак «Эдэр профессионаллар» федеральнай бырайыагын чэрчитинэн Саха сирин орто анал үөрэҕин кыһаларыгар тэриллибит уонна тэриллэ турар мастарыскыайдар тустарынан кэпсээтилэр, орто анал үөрэххэ туттарсыы хампаанньата быйыл хайдах барарын билиһиннэрдилэр.
Оҕолору уонна төрөппүттэри СӨ үөрэҕин уонна наукатын миниистирин бастакы солбуйааччыта Михаил Присяжнай эҕэрдэлээтэ. Сүрүн иһитиннэриилэри СӨ орто анал үөрэхтээһинин сайыннарар институт дириэктэрэ Лилия Иванова уонна орто анал үөрэх кыһаларын салайааччылара, тутар хамыыһыйалар бэрэстэбиитэллэрэ оҥордулар.
Михаил Юрьевич эппитинэн, колледжтарга уонна техникумнарга 43 аныгы моһуоннаах мастарыскыай тэриллибит. Сыл бүтүөр диэри өссө 12 мастарыскыайы арыйаары бэлэмнииллэр. Оттон 2025 сылга диэри эбии араас сатабылларга үөрэтэр 30 мастарыскыай арыллара былааннанар. Кини, маннык мастарыскыайдар тэриллэннэр, тырааныспар, быраабы көмүскүүр уонна баһаары сэрэтэр эйгэлэргэ саҥа идэлэр киирдилэр диэн бэлиэтиир. Ону сэргэ, кини үлэ ырыынагар доруобуйа харыстабылын («Лечебное дело», «Сестринское дело»), экономика уонна үп-харчы идэлэрэ, повардар билигин да күүскэ ирдэнэллэр диэтэ.
Пресс-кэмпириэнсийэҕэ кыттыбыт абитуриеннар спикердэргэ элбэх ыйытыылары биэрдилэр, сорохтор тута баҕалаах колледжтарыгар, техникумнарыгар докумуон туттардылар. Тэрээһиҥҥэ «Абитуриент ыйынньыгын» саҥардыллыбыт таһаарыыта улахан сэҥээриини ылла. Ыйынньыкка арыллыбыт мастарыскыайдар уонна идэлэр тустарынан толору информация киирбит. Ыйынньыкка баар кьюар-куод көмөтүнэн туттарсааччы талбыт идэтигэр ханна үөрэниэн уонна үлэлиэн сөптөөҕүн кытары билиэн сөп.
