Мииринэйтэн Дьокуускайга диэри сөмөлүөт нэдиэлэҕэ биэстэ көтөр. Сыаната – 17 тыh тахса солк. Алтынньы ыйтан Дьокуускайга диэри авиаэриэйсэни бас билэр, “Алроса-авиа” хампаанньа биэнсийэлээхтэргэ 12 тыһ тахса солк тарыыбы олохтоото.
Манна холоотоххо материкка көтөр быдан чэпчэки буолара буолуо. Биэнсийэлээхтэр Москубаҕа көтөллөрүгэр 8.000 солк төлүүллэр. Оттон Иркутскайга диэри биэнсийэлээх дьахталларга, 60 саастарын туолбут эр дьоҥҥо – 2 эрэ тыh солк. Киһи да сонньуйуох, Сунтаарга диэри таксыы сыаната эмиэ 2 тыһ солк. Иркутскайга диэри көннөрү авиабилиэт – 12.000 солк. Син биир Дьокуускайга диэри көтөрдөөҕөр быдан чэпчэки. Оттон Ленскэй куораттан Дьокуускайга диэри “Полярные авиалинии” уонна “ИрАэро” авиахампаанньалар, өрөбүлтэн ураты күннэргэ 7 тыһ көтүтэллэр.
Мииринэйдэр абаккабытыттан сымыһахпытын быһа ытырарбытыгар тиийэбит. Биhиги Сахабыт сирин былаастара манна тоҕо болҕомтолорун уурбаттарый? Киин куоракка – Дьокуускайга материкка көтөрдөөҕөр ыарахан сыанаҕа айанныыбыт. Кэлэ-бара 30-ча тыһ солк. Ким Мииринэйгэ олохсуйа кэлиэй? Итини санаттахха Мииринэйгэ, “Полярные авиалинии”, “Якутия”, “ИрАэро” авиахампаанньалары киллэрэр наада. Ол олох ирдэбилэ. Оччоҕо сыана арыый ама буолуо этэ.
Станислав Алексеев, Мииринэй куората.
Слава “Gelio” Степанов уонна ааптар хаартыскалара.
