Киир

Киир

Төһө да хамсыгынан сибээстээн, урбаанньыттарга да уустук балаһыанньа үөскээбитин иһин, Хаҥалас урбаанньыттара күүстэрин түмэн, Суһал ыстаапка ким туох кыахтааҕынан көрөн, көмөлөһө тураллар.

Бу туһунан оройуон салалтата, оройуон Суһал ыстаабын бэрэссэдээтэлэ Федор Борисов этэр. «Хаҥаластар ханнык да балаһыанньаҕа чугас дьоннорун өйүүр-убуур үгэстээхтэр. Бу билигин да, судургута суох, уустук кэмҥэ улуус урбанньыттара баар балаһыанньаны толору өйдөөн, сэрэхтээх ыарыыны утары  үлэҕэ кытталлар”, – диир, кини. Ол курдук, оройуон сиригэр-уотугар үрдүк бэлэмнээх буолуу эрэсиимэ биллэриллээтин кытта Вячеслав Нестеров салайааччылаах “Нөмүгүтээҕи килиэп собуота” бэлэмниир бородууксуйаларыттан оройуон балыыһаларын хааччыйан барбыта. Хампаанньа тустаах эрэсиим олоччу бүтүөр диэри бу маннык салгыы көмөлөһүөҕүн биллэрэр.  Ол курдук, хас күн аайы килиэп уонна кондитер оҥоһуктарын балыыһаларга тиэрдэ тураллар.
Валентин Иванов дириэктэрдээх “Хаҥалас Ас” тыа хаһаайыстыбатын кэпэрэтиибэ эмиэ туора турбат. «ОкСиэ» бреннэрэ бүтүн Арассыыйатааҕы “Мы Вместе” аахсыйаҕа кыттар, 521 ас нобуорун бэлэмнээн, оройуон 18 муниципальнай тэриллиитигэр олохтоох 65 саастарын ааспыт кырдьаҕастарга буор-босхо түҥэттэ.
Ас нобуоругар сибиэһэй сүөгэй, саха халбаһыыта, кефир, йогурт, иэдьэгэй угуллубутун волонтердар бэрт кылгас кэм иһигэр улуус үрдүнэн, ол иһигэр чиэски сытар нэһилиэнньэлэргэ кытта, тиэрдэн биэрдилэр.  “Хаҥалас Ас” кэпэрэтиип бу уустук кэмҥэ бастакы уочарат нэһилиэнньэ кэбирэх араҥатын, күндү эһэлэрбит уонна эбэлэрбит тустарыгар кыһаллыахтаахпыт диэн санаалаах.
Ону таһынан хоруона хамсыгын кэмигэр “Розторг” хампаанньа бөлөҕө улахан көмөлөөх. Кинилэр Чапаевоҕа олохтоммут обсерваторга уонна Мохсоҕоллоох сыстыганнаах ыарыылары эмтиир салаатыгар дезинфекциялыырга туттуллар хаһаайыстыбаннай табаары ыыппыттар.
Ону тэҥэ улуус урбаанньыттара Хаҥалас оройуонун киин балыыһатыгар канцелярия табаарынан, утуйар таҥас кэмпилиэгинэн, суорҕанынан, биирдэ туттуллан баран быраҕыллар иһитинэн, тонометрынан уонна тус гигиена сириэстибэлэринэн көмөлөспүттэр. Урбаанньыттар балыыһаҕа үп өттүнэн эмиэ көмөлөһөллөр.

“Хаҥалас улууһа” МО пресс-сулууспатын иһитиннэриититтэн

Тарҕат:

Санааҕын суруй

Бүтэһик сонуннар