Икки сүрүн ирдэбиллэргэ сөп түбэһэр дьиэ кэргэттэр, бу көмө харчыга тиксиэхтэрин сөп.
Бастакытынан, бу төлөбүргэ киирсэллэр 2003 сыл от ыйын 3 күнүттэн, 2015 сыл балаҕан ыйын 1 күнүгэр диэри төрөөбүт оҕолор. Бу оҕо оскуолаҕа билиҥҥи кэмҥэ үөрэнэриттэн, үөрэммэтиттэн тутулуга суох.
Иккиһинэн, бу харчы ананар 18-23 диэри саастаах, доруобуйаларын өртүнэн хааччахтаах оҕолору иитэр дьиэ кэргэттэргэ. Өскөтүн, кинилэр 1998 сыл от ыйын 3 күнүн кэнниттэн төрөөбүт буоллахтарына уонна билиҥҥи кэмҥэ өссө да оскуоланы бүтэрэ илик буоллахтарына.
Үлэ министиэристибэтэ бэлиэтииринэн, бу төлөбүрү ыларга сайабылыанньа биэрэр ирдэнэр. Докумуону судаарыстыбыннай өҥөлөрү оҥорор саайт нөҥүө биэриэххэ сөп, эбэтэр Биэнсийэ Пуондатын тэрилтэтигэр бэйэҕит тиийэҥҥит суруйуоххутун син. Сайабылыанньалары от ыйын 15 күнүттэн хомуйан барыахтара.
Быһа холоон, саҥа төлөбүрдэр 20,4 мөл. оҕоҕо тиксиэхтэрэ. Бүддьүөккэ бу сыал-сорук ситиһиитигэр 204 млрд солк. көрүлүннэ. Маннык төлөбүрү оҕолорго аныыр туһунан уураахха, Арассыыйа бэрэсидьиэнэ Владимир Путин от ыйын 2 күнүгэр илии баттаата.
Үгүс дьиэ кэргэттэр бу көмө харчыны, үөрэх дьыла саҕаланарын саҕана ылыахтара. Атырдьах ыйын 16 күнүн кэнниттэн, Үлэ министиэристибэтэ харчы ыытыытын номнуо саҕалыаҕа. Ол эрээри, сайабылыанньаны ыкса күһүн сэтинньи 15 күнүгэр диэри биэриэххэ сөп диэн биэдэмистибэҕэ чорботон бэлиэтээтилэр. Докумуоннары көрүү кэнниттэн, харчы оҕолор төрөппүттэрин усчуоттарыгар түһүөҕэ.
