Саха сиригэр африканскай чуманан сутуллубут сибиинньэ этин суох оҥоруу үлэтэ-хамнаһа бара турарын туһунан өрөспүбүүлүкэҕэ Россельхознадзор бырабылыанньатын пресс-киинэ иһитиннэрэр.
Алтынньы 27 күнүгэр Дьокуускай биир урбаанньытын атыылыыр этиттэн ити вируһу булан ылбыттара. Африка чуматынан сутуллубут сибиинньэ этэ хата куорат маҕаһыыннарыгар атыыга тахсыбата, атыыга кэлэн испитин уруттаан Аллараа Бэстэээх ыстаансыйатыттан тутан ылан туспа анал сиргэ илпиттэрэ.
Ыспыраапка: сибиинньэ африканскай чумата – дьиикэй, дьиэтээҕи уонна декоративнай сибиинньэлэр кутталлаах ыарыылара. Бу чуманан сутулуннахтарына кыыллар олус күүскэ ыалдьаллар, сэниэлэрэ бүтэр, ис уорганнара мөлтүүр эбит. Сибиинньэ африканскай чумата киһиэхэ туох даҕаны куттала суох, ол эрэн субу манан ыалдьыбыт кыыллар 100% өлөллөр.
Биллибитинэн, Дьокуускай куорат урбаанньыта эти Саратовскай уобаластан «СарПродТрейд» диэн тэрилтэттэн сакаастаабыт. Бу бородууктаны киниэхэ Белгородскай уобаластан «АПК Агрофуд» диэн өссө биир атын тэрилтэ тиксэрбит эбит. Дьэ бу манна сибиинньэлэргэ африканскай чума вируһа тарҕаммыт.
Россельхознадзор бу эбийиэккэ харантыын биллэрбит уонна сутуллубут эттэри суох оҥорбут.
«2 туонна 900 киилэлээх сибиинньэ этин бородууксуйатын кэлбит баартыйатын аналлаах туспа эбийиэккэ уматтылар», - диэн биэдэмистибэттэн иһитиннэрдилэр.
Билиҥҥи туругунан Арассыыйаҕа сибиинньэ африканскай чуматын туруга тыҥааһыннаах. Вирус геномнара Ростовскай, Липецкэй, Белгородскай, Нижегородскай, Челябинскай, Свердловскай, Костромской уобаластарга уонна Пермскэй кыраайга биллибит.
