Мииринэйгэ дьиэ сыаната бу муус устартан ыла төттөрү түстэ.
Күн бүгүн алмаастаах кыраай кииниттэн букатын көһөн барааччы ахсаана кэлээччи ахсаанын лаппа баhыйар буолла.
Олохтоох Интэриниэт ситимнэргэ, хаhыаттарга тахсар атыы-тутуу биллэриилэриттэн сирдэттэххэ, Мииринэй куоратыгар 587 дьиэ атыыга турар. Инньэ гынан, атыылаһыан баҕалаахтарга талар-сыымайдыыр кыах хара баһаам.
Урут «материкка» көһөн барааччылар Мииринэйдээҕи кыбартыыраларын туох да олус ыарахан сыананан атыылаан, Арассыыйа атын уобаластарыгар икки дьиэни, эбиитин даачаны атыылаhааччылар. Билигин оннук харам дьоҥҥо, дьиэ атыытыгар букатын хобдох кэм үүннэ.
«Дьиэни атыылаhабыт» диэн биллэрии мэлийдэ.
3 хостоох «сибиэчикэни»(9-с этээстээх дьиэ) 5-6 мөл.солк. сыаналыыр дьон сатаан батарбат туруктаннылар.Маннык улахан иэннээх дьиэлэргэ, дьон саантаабат да буолан турар. Ордук «ходобуой» 2 хостоох «сибиэчикэ» - 4 мөл. солк. сыаналаах этэ. Билигин ону 3 мөл. солк. ыллахтарына, баhыыба.
Атыыга ордук барар 1 хостоох «малосемейканы» - 2 мөл. 300 тыh. солк. – 2.500 мөл. солкуобайга атыылыы олорбуттара уурайда. Мииринэйгэ 4 «малосемейка» («м/с») дьиэ баар. Онно 21 кв. м иэннээх «м/с» ортотунан 1 мөл. 200 тыh. солк. буолла. 30 кыбадырааттаах «малосемейка», ортотунан 1 мөл. 600 тыhыынча солк. сыаналаах.
Ол да буоллар, дьиэ куортамын сыаната син биир ыарахан. Холобур, куорат киинигэр биир хостоох таас дьиэ ыйдааҕы куортама – 25 тыhыынча солк. Биир хостоох, уулаах-хаардаах мас дьиэ куортама – 17-18 тыhыынча. Уопсайга хос куортама – 15.000 солк.
Кыбартыыраны, бэл кииннэммит ититиилээх, уопсай туалеттаах хоhу да дэбигистик кыайан булбаккын. Булар да буоллаххына, самнархай, хаарбах туруктаах мас дьиэлэр эрэ көстөллөр. «Сила Сибири» гаас турбатын ситимэ, Таас-Yрэх тула нефтяник, газовик элбээн, Мииринэй куоратыгар дьиэ атыылаhааччы ахсаана таhыччы элбиэ диэн санаа оруна суох эбит. «Восточная Сибирь» НГДУтугар, ИСТА ситимигэр, «Роснефтькэ» баахта ньыматынан үлэлиир нефтяниктар уонна газовиктар биир-икки да күҥҥэ Мииринэйгэ тохтуу да сорумматтар. Куораппыт кинилэри кэрэхсэппэт. Манна сыана олус ыарахан, «сиэрбис, хааччыйыы эйгэтэ хоччорхой. Ити курдук, Мииринэйгэ дьиэ сыаната эмискэччи түстэ. Маны аахпыт, чэпчэки сыананан дьиэ атыылаhарга дьулуhааччы, табыгастаахтык туhанаргыт ордук курдук. Билигин атыылааччы урукку курдук кириэтэhэн туран кыбартыыратын ыарахан сыананан батара сатыыр кэмэ уурайда. Ханнык-туох кэмнэргэ маннык балаhыанньа турара биллибэт. Сыанабыт арыт кыччыыр, арыт үрдүүр.
Бу – оробуочай куоракка олохпут көстүүтэ, дьиэ ырыынагын суруллубатах сокуона.
Станислав Алексеев, Мииринэй куорат.
