АЛРОСА IТ хампаанньа Дьокуускайга буолан ааспыт “HACK-the-ICE 3.0” хакатоҥҥа кыттыгас сакаасчыт быһыытынан кытынна. Кини “Аналитика” диэн хайысхаҕа бэрт интэриэһинэй сорудаҕы билиһиннэрдэ.
Үгэс курдук, “HACK-the-ICE 3.0” диэн кыһынын ыытыллар хакатоннары өрөспүүбүлүкэ саҥа саҕалыыр да, уопуттаах да IТ исписэлиистэрэ сэҥээрэллэр. Бу хакатоннар көмөлөрүнэн, онно тирэҕирэн, кыттааччылар киэҥ эйгэҕэ бэйэлэрин көрдөрөр, үлэлэрин билиһиннэрэн, бырайыактарын үбүнэн-харчынан өйөттөрөр кыахтаахтар. Саамай сүрүнэ – кинилэр Саха сирин IТ уопсастыбатын сорҕото буолар чиэскэ тиксэллэр.
Быйылгы “HACK-the-ICE 3.0” хакатон сэтинньи 26 күнүттэн 28 күнүгэр диэри буолла. Тэрээһини СӨ Инновацияҕа министиэристибэтэ, “Якутия” технопарка уонна “Якутск” IТ паарка иилээн-саҕалаан ыыттылар.
“Уон сыллаах кирбиини куоһарбыппытыттан олус үөрэбин. Санаабар, технопарка тэриллэрин туһунан биир А4 илиискэ суруллубут дьаһал бэҕэһээ эрэ тахсан эрэр курдуга. Оччолорго дьиэбит да, хамаандабыт да, үбүлээһиммит да – туохпут да суох этэ. Оттон билигин 20 тыһыынча км. м. иэннээх дьиэлээхпит-уоттаахпыт, 1 миллиард солкуобай барыһы киллэрэр 150-тан тахса резиденнээхпит. Бу – саҕалааһыммыт эрэ. Тоҕо диэтэххэ, биһиги аҥаардас ситиһиилээх тэрилтэлэри тэрийэр, инновацияны олоххо киллэрэр буолбатахпыт, биһиги бар дьон баҕа санаата олоххо киирэригэр кыах биэрэбит”, – диэн хакатон арыллыытыгар СӨ Инновацияҕа миниистирэ Анатолий Семенов эттэ.
Миниистир А.Семенов бэлиэтээбитинэн, Саха өрөспүүбүлүкэтигэр 2012 сылтан үрдүкү технология хампаанньаларын уонна үөрэх кыһаларын түмэр инновациялаах эко-систиэмэ үлэлии турар, салгыы сайдар. Ол иһигэр маннык тэрилтэлэр бааллар: “Якутия” технопарка, IТ-паарка, Инжиниринг эрэгийиэннээҕи киинэ, Арктикатааҕы инновация киинэ, “Якутия” венчурнай хампаанньа, ВШИМ, “Точка кипения”, “Мой бизнес”, СӨ Инновация сайдыытыгар пуондата, Инновация министиэристибэтэ, СӨ ЦР уонна IТ, М.К. Аммосов аатынан ХИФУ, “Вебвенчурс”, ДФВТ уонна да атыттар. Кэлиҥҥи сылларга ити тиһиккэ өссө АЛРОСА, “Индрайвер” уонна “МайТона” курдук улахан хампаанньалар кыттыһар буоллулар.
IТ айымньыны оҥорорго туһуламмыт үс күннээх марафон үс хайысхалаах буолла (трек):
– Доруобуйа;
– Тырааныспар;
– Аналитика.
Быйылгы хакатоҥҥа хаһааҥҥытааҕар даҕаны элбэх киһи кытынна. Ол курдук, өрөспүүбүлүкэ 13 улууһуттан уонна Арассыыйа түөрт куоратыттан барыта 206 сайаапка кэллэ. Ол түмүгэр, 56 хамаанда тэрилиннэ. Кинилэртэн финалга 12 хамаанда киирдэ.
АЛРОСА IТ тэрилтэ “Аналитика данных” хайысхатыгар үс хамаанда инники күөҥҥэ таҕыста:
Бастакы миэстэ – Дьокуускай, Москуба уонна Сербия “League of Legends” сүүмэрдэммит хамаандата;
Иккис миэстэ – Дьокуускай “Платформа” хамаандата;
Үһүс миэстэ – Ньурба улууһун “NRB team” хамаандата.
Интэриэһинэй сорудах – сэргэх быһаарыы
Дьокуускай, Москуба уонна Сербия “League of Legends” сүүмэрдэммит хамаандатын кыттыылааҕа Виктор Махатыров “АЛРОСА” IТ тэрилтэ толкуйдаабыт сорудаҕа олус интэриэһинэй этэ” диэн билинэр.
“Үс кейс баара. Биһиги санаабытыгар, онтон саамай уустук сорудахтааҕа АЛРОСА толкуйдаабыт кейсэ этэ. Ол иһин анаан-минээн ити сорудаҕы талбыппыт. Биһиги кэлим алмааһы кэлин буоксаларга хаалыыр курдук категорияларынан тыырар алгоритмы толкуйдуохтаах этибит.
Бастаан интерфейсин толкуйдаабыппыт. Онно алгоритмын киллэрэн биэрбиппит уонна түмүгэр, дьүүллүүр сүбэҕэ билиһиннэрбиппит. Олус тыҥааһыннаах, уустук, ол эрээри интэриэһинэй үлэ буолла. Ис сүрэхпититтэн кыһаллан туран, илиибитин араарбакка үлэлээтибит”, – диэн Виктор Махатыров санаатын үллэстэр. Виктор этэринэн, “League of Legends” сүүмэрдэммит хамаандатын кыттыылаахтара урут маннык тэрээһиннэргэ кыттыбыт уопуттаахтар. Онон бу үс күннээх киирсиигэ урукку уопуттара, үөрүйэхтэрэ улаханнык көмөлөспүт.
“Хамаандабыт оҕолоро бары хакатоҥҥа кытта үөрүйэх дьон. Араас куонкуруска элбэхтик кыайбыттара.
Мин бу үлэҕэ “Notion” диэн үстүрүмүөнү туһанарга этии киллэрбитим. Хамаандаҕа сорудахтары уонна соруктары биэртэлиирим-үллэрэрим, хакатон саамай суолталаах түгэннэрин ыйарым-кэрдэрим. Инньэ гынан, үлэ-хамнас бэрт түргэнник сааһыланна, үс күнү көдьүүстээхтик атаардыбыт.
Быйылгы хакатон сирэй уонна ыраахтан ыытылынна. Мин онлайн үлэлээбитим быдан ордук курдук. Тоҕо диэтэххэ, билигин Москубаҕа үөрэхпэр сылдьабын”, – диэн В.Махатыров эбэн эттэ.
Бэлиэтээтэххэ, АЛРОСА IТ тэрилтэ “Аналитика данных” хайысхатыгар кыайбыт хамаандалар 100-түү тыһыынча солкуобайдаах сэртипикээти туталлар.
АЛРОСА IТ тэрилтэ Саха өрөспүүбүлүкэтин сайдыыга институттарын кытта быйыл иккис сылын үлэлэһэр буоллаҕына, хакатон тэрээһинигэр бастакытын кыттар.
“АЛРОСА IТ тэрилтэ бу курдук киэҥ хабааннаах тэрээһиннэргэ Саха сирин IТ уопсастыбаннаһыгар бэйэтин, туох соруктаах үлэлии-хамныы олорорун билиһиннэрээри, көрдөрөөрү кыттар уонна көмөлөһөр. Дааннай анаалыһын хайысхата билигин ханна даҕаны ирдэнэр, суолталанар буолан турар. Ол эрээри биһиэхэ уонна хакатон кыттыылаахтарыгар бу саҥа хайысха. Маннык тэрээһин сотору-сотору ыытыллара элбиэ, биһиги тэрилтэ өрөспүүбүлүкэ IТ эйгэтигэр кылааппытын киллэриэхпит диэн эрэнэбит”, – диэн Дьокуускайдааҕы РЦО салайааччыта Марина Карамзина кэпсиир.
Үчүгэйэ, үөрүлээҕэ диэн устудьуоннар даҕаны, оскуола үөрэнээччилэрэ даҕаны үрдүк таһымнаахтарын көрдөрдүлэр, кыттааччы ахсаана сыллата эбиллэ турар. Хакатон түмүгүнэн “Бастыҥ оскуола хамаандата” ааты Мииринэй улууһун “Gen Z” хамаандата ылла.
