Иллэрээ күн коронавирус Бүлүү улууһугар кэлиэн сөп курдук диэн уорбалыыр сэмсэ санаа баара, ол дьаҥ бигэргэммитин туһунан иһитиннэриини өрөспүүбүлүкэ Ил Дархана бэҕэһээ сарсыардааҥҥы брифинигэр эттэ. Ол кэнниттэн улуус баһылыга Сергей Винокуров видео нөҥүө ыҥырыытыгар бигэргэттэ.
Кыадаҥдаттан төрүттээх киһи соҕуруу Санкт-Петербург куоракка травматология киинигэр эмтэнэр кэмигэр коронавируска сыстыбыт. Кини Дьокуускайга муус устар 4 күнүгэр көтөн кэлэн баран, дьиэтигэр уолунаан чааһынай массыынанан кэлбиттэр. Ону тэҥэ ыарыһаҕы кытта кэргэнэ, быраата алтыспыт.
Ыарыһах муус устар 7 күнүгэр хирургияҕа кэлэн, 15 мүнүүтэ устата көрдөрүммүт. Коронавируска сыстыбытын билбэккэ сылдьан, ыарыһах хирургия отделениетыгар киирэн тахсыбытын быһыытынан, хирургия отделениета карантиннай зонаҕа киирдэ. Муус устар 7 күнүттэн 10 күнүгэр диэри хирургияҕа сыппыт, сылдьыбыт, үлэлээбит дьон ааттара чуолкайданна, кинилэр самоизоляцияҕа бардылар.
Коронавируска сыстыбыт ыарыһах инфекционнай отделениеҕа муус устар 13 күнүттэн сытар. Бэҕэһээҥҥи күн туругунан 7 киһи обсерваторга киирдэ.
авСуһал штаб үлэтигэр муус устар 14 күнүттэн улуустааҕы прокуратура холбосто. Прокурор эбээһинэһин толорооччу Антон Масин штаб үлэтигэр кытынна. Кини коронавирус дьаҥын улууска салгыы тарҕаппат инниттэн ыытыллар үлэлэргэ прокуратура уонна полиция үлэһиттэрэ күүскэ ылсан үлэлэһэр санаалаахтарын биллэрдэ уонна коронавирустаах дьону кытары алтыспыттар самоизоляция эрэсиимин толору тутуһалларын хонтуруоллуурга, наада тирээтэҕинэ накаастыыр миэрэни ыларга хантаактаах дьон испииһэгин штабтан ирдээтэ.
Ааспыт мунньахха этиллибитин курдук, улуус дьаһалтатын дьыалаларын салайааччы Клара Гаврильева суол быстарыктаах өрүс уҥуор сытар 8 нэһилиэк уонна Бороҕон, Тыымпы нэһилиэктэрэ коронавирус дьаҥар туттуллуохтаах 1 мөлүйүөн 600 тыһыынча суумалаах эми ылыахтарын иһитиннэрдэ.
Киһи олоҕор олус кутталлаах дьаҥы Бүлүүбүт сиригэр тарҕаппат инниттэн бары эппиэтинэстээхтик сыһыаннаһаммыт, изоляция кэмигэр дьиэбитигэр олороммут, бу дьаҥтан көмүскэнэр соҕотох сөптөөх биир суол баарын тулуйан тутуһуоҕуҥ. Мааскалаах сылдьыаҕыҥ диэн улуустааҕы суһал штаб нэһилиэнньэни ыҥырар.
Андрей Яковлев, ulus.media/
