Харчы киириитэ от ыйын саҥатыгар саҕаланыаҕа.
Хамсыгы утары быһыы ылбыт Хотугулуу-Илиҥҥи федеральнай университет устьудьуоннара 3000 солк. кээмэйдээх матырыйаалынай көмө ылыахтара. Бу туһунан ХИФУ үөрэҕи таһынан үлэҕэ уонна ыччат бэлиитикэтигэр проректора Александр Ильин ТАСС-ка иһитиннэрдэ.
«Хамсыгы утары быһыыны ылбыт устудьуоннарга, университет үс тыһыынча кээмэйдээх матырыйаалынай көмөнү ыытыаҕа. Устудьуоннар усчуоттарыгар харчы киириитэ от ыйын бастакы күннэриттэн саҕаланыаҕа», - диэн Ильин эппит.
Үрдүк үөрэх пресс-сулууспатыгар чопчулаабыттарынан, устудьуоннарга хамсыгы утары быһыыны биэрии бу дьыл олунньу ыйыттан саҕаламмыта. Билиҥҥи туругунан, университет үрдүнэн устудьуоннар уонна үлэһиттэр ортолоругар быһыыны ылыы салҕанан бара турар. Куттала суох буолуу туох баар миэрэлэрэ тутуһуллаллар. Университетка 19 тыһ. кэриҥэ киһи үөрэнэр.
Саха сиригэр хааччахтыыр дьаһаллар тохтотулла иликтэр, от ыйын 15 күнүгэр диэри уһатылыннылар. Мэдиссинэ мааскаларын кэтии уонна социальай арыт тутуһуу булгуччулаах. Уопсастыбыннай аһылык тэрилтэлэригэр уонна онтон да атын элбэх дьон мустар уопсастыбыннай сирдэригэр үлэлиир бириэмэлэригэр, уораҕайы толорууларыгар кэккэ хааччахтар өссө да бааллар. Ол эрээри, от ыйын 1 күнүттэн бу тэрилтэлэр туох да хааччаҕа суох үлэлиэхтэрин сөп, өскөтүн кинилэр «хамсыктан босхоломмут» тэрилтэлэр реестрдарыгар киирдэхтэринэ. Ол эбэтэр, чуолаан хамсыгы утары быһыыны ылбыт дьону ыспараапкалаах уонна ПЦР анаалыстарыгар ыалдьыбатах диэн көрдөрүүлээх килийиэннэри киллэрэр буоллахтарына.
