Бэҕэһээ о.э. сэтинньи 12 күнүгэр Чурапчы нэһилиэгин Аҕа баһылыга Владимир Сивцев уонна нэһилиэк аҕаларын сүбэтэ көҕүлээһиннэринэн, Чурапчы түөрт оскуолата холбоһон Ньидьили үрэҕин түгэх тардыытыгар муҥха тэрийдилэр.
Бу дьоһуннаах төрүт үгэс сыл ахсын үтүө үгэскэ кубулуйан ыытыллар. Үүнэн иһэр ыччаты айылҕаҕа, сиргэ-уокка сылдьыыга, ордук уол оҕо оскуолаҕа үөрэнэр эрдэҕиттэн муҥхалааһын быраабылатын, муҥха сокуонун билэ улаатарыгар, кэлин ыал аҕата буолан дьиэ кэргэнин кыстыгы туоратарыгар сүҥкэн оруоллаах. Муҥхаҕа уопсайа 60-ча ситэн эрэр оскуола үөрэнээччилэрэ ону таһынан оскуола, нэһилиэк дьаһалтатын салайааччы эр дьоно сырыттылар.
Нэһилиэк баһылыга Владимир Сивцев, баһылык солбуйааччыта Алексей Бурцев мустубут муҥхаһыттарга балыктааһын хаамыытын билиһиннэрдилэр. Ол эрэ кэннэ, дьэ, ким анньыылаах, ким нырыылаах эбэҕэ сүүрэн киирэн үлэлээбитинэн бардылар.
Килэрийбит ыраас мууска сытыы уһуктаах анньыы быыстала суох лычырҕыыра истэргэ кэрэтин!
Муҥха кэнниттэн, салгыы, уолаттарга эстафетаҕа, итиэннэ абсолютнай хаатыҥканы быраҕыыга уонна хаар айан анал күрэхтэһиилэр ыытылыннылар. Эстафетаҕа 1-кы миэстэ Дмитрий Коркин аатынан интэринээт-оскуола иитиллээччилэрэ, 2 миэстэ Степан Макаров аатынан Чурапчытааҕы гимназия уонна 3-с бочуоттаах миэстэни Иван Павлов аатынан Чурапчы орто оскуолатын үөрэнээччилэрэ буоллулар.
Дьэ, итинник аҕа сүбэтин түмсүүтэ, кыһыҥҥы сибиэһэй салгыҥҥа дуоһуйа сынньаннылар, уолаттары өбүгэ төрүт үгэстэригэр үөрэттилэр, этэргэ дылы, өр кэмҥэ муунтуйбут тыыннарын таһаардылар. Эр киһи сиэринэн бука бары дьиэлэригэр илии тутуурдаах бардылар. Барыта холбоон инчэҕэйинэн 150 куул собону ыллылар, үллэстии кэнниттэн ордубут балыгы сиэр быһыытынан нэһилиэк кырдьаҕастарыгар, кыаммат араҥаҕа түҥэтилиннэ.
Источник: https://санаолох.рф/article/30821
