Сэриигэ барыаҥ этэ дуо?

«Кыым» норуот хаһыата олунньу 23 күнүнээҕи нүөмэригэр тахсыбыт матырыйаалы таһаарабыт. Ыйытык тахсыбытын сарсыҥҥы күнүгэр Украинаҕа сэрии саҕаланна диэн буолбута. Онон, сэриибит саҕаланыа оруобуна биир хонук баарына уолаттар "Сэриигэ барыаҥ этэ дуо?" диэн ыйытыкка хоруйдаабыттарын «актуальнай» диэммит, саайпытыгар угабыт.

Куһаҕаны биттэммэппит эрээри, «арай сэрии буолан хаалар түгэнигэр, саа-садах тутан сэриигэ барыаҥ этэ дуо?» диэн ыйытыыны билэр-билбэт дьоммор биэрдим. Хоруйдааччылар – орто саастаах эр дьон. Ону хайдах баарынан сурукка түһэрдим.

* * *

Владислав Юмшанов, Чурапчы Чакырыттан төрүттээх, ас-үөл эйгэтигэр үлэлиир:

– Бүтэһик сонуннары истэ-истэ киһи санаата түһэр. Араас буолан хаалыан сөп. “Сэрии буолар үһү. Барар үһүгүн” диэтэхтэринэ, барарбар тиийэбин. Уоттаах сэрии Саха сиригэр эрэ киирбэтин.

* * *

Арыйаан, ырыаһыт:

– Ити ыйытыыга, хомойуох иһин, кыайан хоруйдуур кыаҕым суох.

* * *

Игнатий Слепцов, Дьааҥыттан төрүттээх, А.П. Петров аатынан Бэйдиҥэтээҕи норуот айымньытын киинин дириэктэрэ:

– “Сэрии буолла” диэтэхтэринэ, хайдах эрэ итэҕэйиэ суох этим. Билигин олох сайдан, саа-саадах тутан сүүрбэппит чахчы. Арай, кырдьык, былыргылыы сэрии буолар түгэнигэр, Ийэ дойду туһугар баҕа өттүнэн туруулаһааччы соччо элбэҕэ суоҕа буолуо. “Мин тугу сатыыбыный? Онно тиийэн тугу көмөлөһүөхпүн сөбүй?” диэн санаалар үүйэ-хаайа тутуохтара эбитэ буолуо.

* * *

Александр Сивцев, эдэр исписэлиис, Дьокуускай:

– Атын дойду сирин ылар туһугар, нууччалыы этиим, “в интересах корумпированных узурпаторов” барбаппын. Суох, суох, өссө төгүл суох.

* * *

Сандал, ырыаһыт:

– Арай соһуччу сэрии буоллаҕына, саа-саадах тутан, Ийэ дойдубун көмүскүү барабын. Оҕо эрдэхпиттэн сэриилээх, кыргыһыылаах киинэлэри көрөрбүн сөбүлүүбүн. “Арай илэ-чахчы маннык балаөыанньа буоллун. Хайыа этигитий?” диэн доҕотторбун кытта кэпсэтээччибит. Сэриигэ тиийэн баран дойдубун таҥнарбакка, куттанан-уолуйан куоппакка, туһалааҕы оҥоруом, эрэспиэккэҕэ эҥин таах сылдьыам этэ. Сирдээҕи олоҕу умнан туран кыргыһабын. Дьоруой буолан дойдубар эргиллиэм эбэтэр кыргыһыы толоонугар дьоруойдуу өлүөм этэ. Санаабычча эттэххэ, сэрии да буолбатар, “араас хабааннаах иэдээҥҥэ – улахан баһаары, халаан уутун утары – бары бииргэ турунар, түмсүүлээх буолуох” диэн сахам ыччатын ыҥырыам этэ.

* * *

Аркадий Егоров, Абыйга олорор, култуура эйгэтин үлэһитэ:

– Туох дьикти ыйытыгай? Ону биһигиттэн ыйытыахтара диэтэҕиҥ дуу? Бирикээс кэллэ да, барар буоллахпыт. Барбатахпытына, “дезертир” аатырабыт. Онон, барарга эрэ тиийэбит.

* * *

Сахамин Алексеев, атыы-эргиэн киинин харабыла, 32 саастаах, Бүлүүттэн төрүттээх:

– Дьэ, иэдээн буолар. Уопсайынан, олохпут күн-түүн ыараан иһэр. “Сэриигэ ыҥырабыт” диэтэхтэринэ, хара бүтэһиккэ диэри куотуна сатыам этэ. Үс оҕолоохпун, кырабыт аҕыйах ыйдаах. Ипотекалаахпыт, онно эбии кирэдьииттээхпит. Билигин бааҥҥа ыйга уопсайа 35 тыһ. солкуобайы таах кута олоробут. Сэриигэ бардахпына, дьоммун ким көрүөй-истиэй, аһатыай-таҥыннарыай?! Дьэ, иэдээн, доҕоттоор! Сэриитэ да суох кэлин араас санаа баттык буолар буолла. Бу иэстэрбититтэн өтөрүнэн босхолонор чинчибит суох. Ас, бородуукта сыаната күн-түүн үрдүү турар. Оҕолор улаатан көрдүүллэрэ элбээн иґэр.

* * *

Иван Слепцов, Үөһээ Дьааҥы:

– Уоттаах, улахан сэрии буолбатаҕына даҕаны, экэниэмикэбит үрэллэн, ыһыллан, олох-дьаһах хааһыланыан, оттон ол боростуой дьоҥҥо, норуокка сэрииттэн итэҕэһэ суох иэдээни аҕалыан сөп. Билигин буола турар быһыы-майгы оннукка тиэрдиэн да сөп курдук. Аны туран, Арассыыйа аармыйата уруккутун курдук буолбатах. Патриоттуу тыыҥҥа иитиллибэтэх эдэр оҕолор тугу көмүскүү барыахтарай? Олигархтар коттеджтарын дуо? Арай биир эмэ сарсыарда уһуктан баран араадьыйаны холбообуппут: “Говорит Вашингтон”, – да диэтэхтэринэ көҥүлэ.

* * *

Айсен Корнилов, реклама менеджерэ, Ньурбаттан төрүттээх:

– Дьон “улахан хамсааһын тахсаары гынна, сэрии буолар буолла” диэн куттанар эрээри, урукку курдук улахан кыргыһыылар буолуохтара суоҕа. Аан дойду үһүс сэриитэ буолбата чахчы. Өскөтүн сэрии буоллаҕына даҕаны, маҥнай утаа күө-дьаа буолан баран, тохтуохтара, дьыала-куолу кэпсэтиинэн быһаарыллыаҕа. “Сэриигэ ыҥырабыт” диэтэхтэринэ, барарбар тиийэбин.

* * *

Николай Егоров, Чурапчы:

– “Саа-саадах тутан, икки илиибитин өрө ууммутунан кыргыһа барабыт” диэн хаһан даҕаны өлүү-сүтүү диэни көрбөтөх, хаан тохтуутун билбэтэх дьон этэллэр. Мин тус бэйэм барар санаам суох. Бэлиитикэ оонньуутун бэйэлэрэ оонньоотуннар, тоҕо онно биһиги, боростуой норуот, эмсэҕэлиэхтээхпитий? Былыр үйэҕэ атыыланан бүппүт, баайдар илиилэригэр, бас билиилэригэр киирбит Аҕа дойдубутун көмүскүү дуо?

Сирэйгэ Бастакы советско-украинскай сэрии архыыбынай хаартыската аһаҕас саайтан ылыллан туһанылынна