СӨ Ил Дархана Айсен Николаев Бүлүү улууһун уопсастыбаннаһын кытары экология боппуруостарын тула кэпсэттэ.
Көрсүһүү саҕаланыытыгар Айсен Николаев дуоһунаһыгар талыллыбытынан эҕэрдэлээтилэр уонна экология боппуруоһугар болҕомтотун уурарыгар махтаннылар. Онуоха кини бастакы уурааҕа экологияны харыстааһыҥҥа туһуламмытын ыйдылар. Бүлүүлэр сыллата тахсар ойуур уота турарыттан дьаарханалларын этиннилэр уонна “Зеленый пояс Вилюя” диэн Д.Г. Макаров аатынан пуонда ыытар аахсыйаларын туһунан кэпсээтилэр.
“Экология аахсыйатыгар 700-тэн тахса оҕо кытынна, кинилэр 4 тыһ. кумааҕы туруйаны көтүттлэр. Манна Бүлүү, Үөһээ Бүлүү, Сунтаар улуустарын уонна Дьокуускай куорат үөрэнээччилэрэ кытыннылар. Бу аахсыйанан оҕолор уопсастыбаннас өрүс киртийиитигэр уонна нэһилиэнньэ экологическэй култууратыгар болҕомто ууруллара уолдьаспытын көрөдрдүлэр”, - диэн “Чуораанчык” оҕо уһуйаанын сэбиэдиссэйэ Наталья Корякина кэпсээтэ.
Ол кэннэ Бүлүү уопсастыбанньыктара Ил Дархаҥҥа кумааҕы туруйаны туттардылар, итиэннэ Бүлүү өрүскэ тахсыбыт экология саахалын туоратыыга дойду, өрөспүүбүлүкэ уонна “АЛРОСА” салалтатыгар модьуйууну туттардылар. Айсен Николаев кинилэргэ үүнэр көлүөнэ ыччакка экология култууратын иҥэрэллэрин иһин махтанна уонна модьуйуу аадырыстаммыт сиригэр хайаан да тиэрдиллиэҕэ диэн эрэннэрдэ.
“Бырамыысалыннас муҥутуу сайдар үйэтигэр ордук экологиябыт айгырыыр. Тоҕо эрэ экологияҕа улахан хоромньуну сир баайын туһанааччы тэрилтэлэр эрэ таһаараллар диэн тутах өйдөбүл баар. Оннук эрэ буолбатах ээ. Куораттар уонна нэһилиэнньэлээх пууннар кырата суох хоромньуну таһаараллар. Инньэ гынан, мин таһаарбыт бастакы уурааҕым чуолаан экологияҕа сыһыаннаммыта. Биһиги экологияҕа сыһыаммытын тосту уларыйарбыт уолдьаста, оҕолорбутун отой кыра эрдэхтэн тулалыыр эйгэҕэ харыстабыллаахтык сыһыаннаһалларын курдук үөрэтиэхтээхпит. Оччоҕо эрэ күттүөннээх хардыыны оҥоруохпут”, - диэтэ Айсен Николаев.
Санатар буоллахха, Саха сирин экологическэй туруктаах буолуутун туһунан уурааҕы Айсен Николаев балаҕан ыйын 27 күнүгэр таһаарбыта.
